利物浦完成咗贏英超冠軍呢個終極目標後，最近嘅比賽成日失準，禮拜三佢哋作客近況同樣麻麻嘅阿仙奴，就連一向好穩陣嘅中堅華基爾雲迪積克（VVD）同門將艾利臣比加都一齊派膠，結果呢對價值1.5億鎊（約14.5億港元）嘅防線組合，連累紅軍以1:2輸波。紅軍已肯定冇法突破2季前曼城創下100分英超單季得分紀錄。雖然VVD將責任攬晒上身，但外界就寸佢同艾利臣齊齊變成「派膠達人」大衛雷斯！
「大衛VVD」認衰
贏咗英超冠軍、但仲有好多紀錄可以破嘅利物浦，其實今場有個好開始，踢咗20分鐘就由沙迪奧文尼接應安德魯羅拔臣傳送近射得手領先；點知到32分鐘，VVD喺雷斯尼爾遜死纏下回傳失誤，結果拿卡錫迪喺禁區內截到個波，扭過埋艾利臣射入空門幫阿仙奴追平。完半場前一分鐘，今次輪到艾利臣出事，佢將個波傳畀羅拔臣時唔夠力，拿卡錫迪又截到，傳畀尼爾遜射入，幫阿仙奴完半場反超前2:1。
下半場利物浦急起直追，但全場多達24次射門，都過唔到今場有多達八次撲救嘅阿仙奴門將達米安馬天尼斯，反而阿仙奴全場得3次射門就入咗2粒，最終以2:1擊敗利物浦。賽後紅軍36輪得93分，聯賽得番兩輪，就算贏晒都只可以拎到99分，冇辦法突破曼城2季前嘅100分紀錄。
仲有三紀錄追逐
賽後罪人VVD被網民寸爆，話佢變咗經常犯錯嘅阿仙奴中堅雷斯，仲將後者嘅爆炸頭key咗落VVD同艾利臣度；VVD承認犯錯將責任攬晒上身：「好明顯佢哋嘅入波都係我哋送嘅，我要負全責。」不過紅軍領隊高普就話：「球隊踢咗一個出色嘅球季，冇人可以搶走佢哋嘅功勞。」其實佢哋仲有三大紀錄可以爭逐，包括最大分差奪冠、全季最多勝仗同單季最多主場勝仗，其中佢哋下場捧盃戰贏到車路士，就可以同曼聯、曼城同車路士睇齊單季最多18場主勝！