民×聯晒冷見記者，拍照背景寫住「反攬炒，救香港」。但出師不利排位拍出來的照片，剛好遮住個「反」字，得返「攬炒救香港」。
鄭市長是攬炒方面的專家，或者「內奸」甚至sleeper agent，任你封號好了。攬炒救香港，釜底抽薪，條橋似乎已經被鄭市長用咗，只係好似天氣咁，不似預期。初選前，武肺忽然再爆發，源頭不明，疑點重重。時間卻是校到啱啱好，港府食住個勢借武肺翻發，人人自危，初選又冇錢賣頭版廣告，妄想有17萬票咁多？鄭市長摵起條眉冷笑：嘿你哋諗多咗！誰知，死啦……好多票！蛇餅無齋，兼夾欠粽，照排你兩粒鐘！
鄭氏攬炒，還有什麼板斧？DQ拉人告国安法嗎？香港人的恐懼已經由心落格到胃，消化咗。分化泛民與本土抗爭派嗎？兄弟爬山，各自開燈，初選結果連長期埋伏的攪屎棍都被迫收檔。保皇契弟要攬住贏，只能由国安緊急替港府修例，記名投票！19萬公務員，首當其衝！闊佬發愛黨聲明表忠都唔掂，一定要投票打卡，上載微博，王冬胜老海鮮，二次倒模！到時大量藍絲被感召，感恩從深圳灣與港珠澳橋倒灌回來投票，壯觀過九孔排洪。