曾經效力貝利同牛津聯等英格蘭低組別球會嘅前香港青年軍戴偉浚，噚日終如願加盟中超嘅深圳佳兆業。上季效力狼隊U23嘅戴偉浚為爭取更多上陣機會，早排去咗由前意大利國腳鄧納東尼執教、原先降落中甲嘅深圳佳兆業試腳，深圳噚日公佈新季14名新加盟球員名單，戴偉浚都榜上有名。由於天津天海解散，上季護級失敗嘅深圳重獲今季中超參賽席位，呢支富豪球會銳意擴軍，除簽入郜林同王永珀等前國腳，亦羅致咗「殺人王」姜至鵬、孫可同戴偉浚等14名球員，戴偉浚會着8號。今年7月先滿21歲嘅戴偉浚符合中超每季可註冊3名中超U21嘅名額，可以以U23球員身份喺中超上陣。戴偉浚有機會賺取過百萬年薪人仔，當然要入鄉隨俗，波衫英文名由Dai W T（Wai Tsun），變成Dai W J（Wei Jun）。