【港情講趣】
港漫都是打打殺殺？在全盛時期，除龍虎群英、華英雄、聶風、海虎，還有愛情、鬼古類。不過來到二十幾年後的今天，還有嗎？有，聖經漫畫《我是王》，作者小偉（真名張文偉）畫港漫出身。為甚麼畫聖經漫畫？以為他會答得好老套，「當年求神畀我做到漫畫主筆就畫聖經漫畫，而家找數。」
小偉入行於港漫的黃金年代，「1989年加入玉郎集團，做助理，執稿、填頭髮開始。」當年盛世，每星期幾十本港漫出版。「因為細個睇《龍虎門》，立志做漫畫家。當年16歲，見到玉郎請人，中五會考未放榜就去見工。我記得見工好多人，十幾二十人排隊。」怎知入行後團火越燒越細，「未入行就覺得自己畫得好勁，但一入行，發現工作地方就係集合一班覺得自己畫得好勁嘅人，就覺得自己好廢。」做了十年，終於正式做圈稿（構思畫面的最雛型草圖）、起稿，「第一本圈稿，係馮志明《霸刀》，之後司徒劍僑《拳皇Z》、《拳王2000》、《紅魔鬼》。」再之後，沒有當上主筆的運氣，就另覓出路，「同同事開畫室教港漫，之後又搵到份職業訓練局教畫漫畫嘅工作。」至2006年，港漫式微再式微，做的人少，學的人也少，畫班也開不成。
「2006年，當時有位弟兄喺澳洲返嚟，話想出聖經漫畫，當時香港漫畫圈只得三、四個人信耶穌，所以就搵到我。好感恩，當時失業約一年。」當然要有信仰，才能畫出福音漫畫，「神就好好，好似一個福音見證咁。初初我入行同神講，如果做到漫畫主筆，我要為神畫一本漫畫，當然之後就冇咗件事，到我失業一年就有呢個機會畀我找數。」
出版主安排 撞正《達文西密碼》上映
說到信仰，預計答案都是從小信教、每星期上教會，但小偉好像不太肯定，「自小已經信？我覺得係囉，細個讀書好差，唯獨聖經科考得好，令我有成功感，可能因為咁對神有好感。不過我一直都冇返教會，升中學後又唔係讀宗教學校。入行做漫畫，圈內僅有幾個信基督教嘅行家，咁啱有一個坐我隔籬，先開始同神有交集。」
2006年，他終於當上漫畫主筆，第一次出福音漫畫，神繼續好好安排。「第一本畫嘅係《漫畫聖經受難編》，畫嘅時候係電影《受難曲》上映，出嗰陣就係《達文西密碼》上映，嗰陣都幾多傳媒搵我哋訪問，講吓漫畫同電影、聖經講嘅有乜分別。本身計劃早幾個月出，但延期後就撞啱時間，如果早啲出就撞唔到《達文西密碼》，可能冇咁多訪問。當時都賣得唔錯，有萬幾書，好滿意啦。」不過滿意不代表長做長有，「我都以為可以一直做落去，點知嗰位弟兄轉頭就返咗澳洲，不了了之。」
到2009年，「我會形容係突然着咗個掣，開始對信仰狂熱起嚟，會睇創世電視，又返教會。當時就諗，2006年畫過福音漫畫，係咪可以用自己技能再延續？但外國都有好多，點解要畫多本？係，好多人畫過，但冇一本將所有情節撮要出嚟。於是就籌備畫《使徒行傳》，不過要做好多資料搜集，了解經文，仲想有少少譯經嘅成份，唔係淨係耶穌好勁。」那時開始，小偉就和另一位基督徒漫畫家合作，全職畫聖經漫畫。
全職畫漫畫能否維持生計？「梗係維持唔到啦，都係靠積蓄，感恩我同太太都有積蓄。漫畫係賣得幾好，但冇乜利潤，因為我目的係傳道，唔希望價錢高就少咗人買，所以價錢同一般漫畫書一樣。《使徒行傳》第一期賣$38，賣到過8,000本；2018年推出嘅《我是王》第一期賣$50，出咗一年都賣超過2,000本。」靠積蓄，盡量慳，「我喺屋企做，盡量自己做，自己唔使出糧，只係花時間、精神。賣書拉勻都夠印刷成本，OK嘅。」
遊走以色列曠野 做資料搜集
傳統港漫主角，粗眉大眼滿身肌肉。「我記得市場上曾經出現過一本講摩西，摩西好大隻，好似石黑龍咁。所以我都成日提醒自己盡量唔畫咁港漫feel，但我浸咗咁多年港漫，搣唔甩嗰陣味。我有一次同外國傳教士見面，我畀自己本漫畫佢睇，佢嘅反應就係：『Oh! Muscle Jesus!』。不過，耶穌一定大隻喎，佢係木匠，要親自伐木，冇理由太瘦。」
《我是王》第二期預定今年11月推出。「我有鞭策自己嘅，不過係質素方面。反而我太太成日都講，《使徒行傳》四年畫到三本，點解《我是王》用咗五年時間畫一本？因為我當《使徒行傳》係熱身，《我是王》就要做得更好，而且涉及更多聖經部份，唔可以錯。」籌備第一期時，他更去了以色列十多天做資料搜集，「我記得有日凌晨6點去咗酒店附近嘅曠野，係咁行，感受吓耶穌喺曠野40日嘅感覺，有啲嘢喺去完以色列之後會立體咗。返到嚟，又有好多嘢改。」不過他說漫畫都已經上軌道，「預定畫五期，以〈馬太福音〉為主軸，劇本大綱五期寫晒。第二期用咗年半時間，而家畫到尾聲。之後三本預計三至五年內完成到。」出完漫畫後，小偉還有終極目標，「出動畫，以《我是王》為藍本。成本好高，所以計劃眾籌。基督徒好多都有能力又樂意捐獻。你畀到個遠景佢哋睇，知道你想傳福音，到時我會製作一條trailer，希望做26集動畫或電影版。」
近來識新朋友，都會好奇對方的政治取態，但肯接受我們訪問，大概都知，「一定係黃，喺宗教角度，神嘅教導係『行公義，好憐憫，存謙卑的心，與你的神同行。』佢係一個好好嘅神，唔係一味講律法嘅神，當中講過：『我喜愛憐恤，不喜愛祭祀。』現代講法，佢就係情理兼備嘅法官，就算你犯咗法，佢會明白你苦況，會體諒你，即係可以只判社會服務令嘅啫。我識嘅基督徒朋友大部份都係黃，但有啲舊派牧者會覺得如果表達自己諗法，會影響好多國內傳道工作。但諗深一層，唔合理喎，你覺得神自己冇計劃？要靠人卑躬屈膝先救到基督徒？咁我哋嘅神咪好冇用？咁你咪勁過神？我相信神一定有佢嘅計劃，神嘅眼界唔係你安居樂業就好，係你要真係認識神，先係好。」
記者：陳孝義
攝影：伍慶泉
場地提供：Pavilion Cafe