藍絲又有新「文創」搞作！不過佢哋今次嘅「文創」，可能有法律手尾跟！近日有人開設面書專頁，向全港派發製作精美嘅「亂港小精靈系列」刊物，唔少民主派人物榜上有名。刊物彩色大大本，封面寫住「PKKWONC9 GO」同「亂港黃屍狗圖鑑」，不過呢本「亂港小精靈系列」刊物，封面重有隻比卡超，仲頁頁都有任天堂嘅寵物小精靈圖，唔知仲以為係任天堂出！好多網民即鬧爆，政府、建制呢頭叫人守法，唔知出呢本書嘅人問咗任天堂拎授權未呢？
八方睇呢本「亂港小精靈系列」，第一眼就見到大木博士嘅圖被放大到起晒格仔，實在忍唔住問，點解要拎張咁低清嘅圖呢？
唔抵得民主派同一陣線
八方決定無視審美繼續睇，發現作者都幾欣賞民主派，話民主派以往內鬥爭地盤，但反修例運動之後「居然扮成同一陣線」，咁算唔算藍絲都讚民主派呢？圖鑑入面被點名嘅有鄭松泰、莫乃光、黃子悅、楊岳橋、區諾軒等，網民連登仔亦有份，配圖重用係幾年前嘅經典「金鐘M記合照」，作者都跟得好貼。
但最神奇係作者已經搵出香港「黑暴」嘅首領，原來就係區諾軒！根據圖鑑描述，區諾軒「喺示威活動中能夠呼風喚雨」勁過神婆咁，唔知催淚彈、水炮車又係咪區諾軒召喚出嚟？算唔算躺着也中槍呢？一可惡嘅連登仔強烈懷疑成本書根本冇拎任天堂授權，已經急不及待咁寄咗N封侵權投訴畀任天堂舉報，有人仲話facebook應該關閉呢個「亂港小精靈系列」侵權專頁。不過激嬲愛國愛黨藍絲，隨時俾佢哋咬返轉頭！
李八方