中美就香港、貿易同南海等問題幾乎日日開火，當中畀中國政府鬧得最多嘅，一定係美國國務卿蓬佩奧，事關佢同美國總統特朗普一樣，除咗公開發言挑北京機，仲成日係Twitter發文打中國，好似佢噚日喺Twitter貼咗張寵物相，唔知佢有心定冇意，又辣着一班小粉紅。
特朗普噚日簽咗《香港自治法》同取消香港特殊地位，蓬佩奧同日喺Twitter發文，原本佢想晒下自己屋企隻狗仔Mercer好得意，寫咗句「Mercer同佢喜歡的玩具」，但睇真啲原來Mercer嘅玩具入面有一隻小熊維尼！眾所周知內地同海外網民用維尼形容習近平，呢張相即時辣着一班小粉紅聲討蓬佩奧，但亦有網民做花生友，話一定係特登，又問估吓維尼見到有乜感受呢？