阿武決定搬屋了。
他原本住劏房，環境惡劣但也算有瓦遮頭，平日開工後，到麥記或商場涼冷氣，夜了才回家，因為慳電只開風扇，近廁所氣味難聞，每個夏天就此熬過──但疫情下更難熬，廁所反而可以「唞氣」。
劏房的租金又加了，超過$5,000，武肺二三度爆發，人人躲在房中不外出，更無商量餘地。
想不到他竟找到一間，私樓還平過劏房？
經紀也不轉彎抹角了：
「陳生，單位細，唐樓5樓冇𨋢，當然不能收得貴。但個盤好一般是另一回事，業主咁平租，唔多唔少有D污糟嘢，煞氣大D就頂得住。」
阿武一直認為父母改壞名，雖然出生時黑實壯健，濃眉大眼，頭又硬，跌落地也不受傷──阿武好威武，不過就快變「阿冇」，不吉利。
之所以找平租地方搬，因市道不景。他做搬運，幸好與老友夾份，一腳踢，又搬抬又開車，總算有工開，不過近幾個月營業額已跌了一半，又說疫情嚴峻連食肆晚6至凌晨5時不准堂食，死硬，大家還是省着點。
他對經紀笑道：
「我不怕鬼，只怕窮只怕餓。我有躁狂症，夠陽剛，打走唔少女同八婆外母，而家一支公冇人冇物，你同業主講，再減$500我就租。」
業主順攤，經紀還減了點佣，看來是急於成租。（明續）