在餐廳遇見3位同事跟客人N食飯，我跟客N稔熟，他請我坐埋一枱。
3位同事原來在「笠客」，同事A客人N說：「老闆！呢度3個單位，拆幾幅牆就可以打通，整返大入口。仲有樓底好高，可以起閣樓。單位通晒，然後再分間十幾個細單位賣出去。嗱！利潤，有五成。」同事B及C順手推舟，齊聲附和。
同事們催眠式銷售，客人N終於出聲：「我未做過劏場。呢度做唔做到㗎？等我問吓則師先啦。」同事A就一句質埋去：「老闆！呢個盤一陣間有人爭，業主就反價。嗱！我一陣帶份臨約去你公司啦！」突然客人N看着我，然後問：「你點睇？」嘩！就像把一個僅餘10秒的計時炸彈拋到我身上。明知同事「笠客」，唔通我答唔得咩！明知熟客被「笠」，出咗事，我咪無咗呢條水喉射住？人生交叉點，扮無知？借尿遁？
我答：「改動大廈、興建閣樓、改動大門，唔係要同屋宇署入則申請批准先作實嘅咩？有機會牽涉《建築物條例》、地契和大廈公契的可能性喎！大廈建築面積達咗上限，獲批建閣樓嘅機會好低。呢啲最好問吓則師。」最終我選擇客人，放棄了同事，講事實箒。如果因為唔識做，被同事篤灰，最終被炒，至多咪轉公司囉。公司可以換，客人跟一世。自此之後客人N都有搵我出入貨！
小師兄
http://fb.com/siuching28
本欄逢周四刊出