61萬市民「響應」曾司長投票，初選兩日天氣熱辣辣，斷估曾司長個屁股坐唔住兼凍冰冰，甚至由屁股凍到上心口，網傳被急召入西環照肺，雖然否認，但唔心慌就假。繼鄭市長之後，被藍屍認定是假藍真黃的曾高官，雖然黃營當係笑話，智慧與勇氣皆滅的藍屍上晒頭火都嚟，篤灰陸續有來。天后維景勝在房多，藍屍向国安進言，西環速令，預留N號房俾高級公僕，度身訂做。所謂的sleeper agent，別號港英餘孽，信納得過嗎？豬乸會上樹！迫令國內圖書館將「1984」與「動物農莊」下架的維尼集團，經歷去年區議會的保皇輸甩底褲，今鋪點會再睇漏眼，點會俾珠姐「睇死」。
民間初選，撞着武肺忽然爆升，香港人並無自我截龍，排隊投票的有老有嫩。對此成反比的，是深圳灣出境大堂大打蛇餅的新香港居民，闔家北上，對記者說「內地防疫好過香港！喺香港仲驚！」棄港feel定格，堅忍香港人以票回應：「我更驚以後冇得投。」近萬人棄疫港，北上投共，打個八折有數得計，假如九月武肺續爆，保皇黨種落的票，隨時化為烏有，點交差？叫停九月選舉嗎？N號房，做硬嘢。