來自馬來西亞的廖子妤（Fish）來港發展已經第八個年頭，拍過多套電影，由《末日派對》出道，到裸露演出的《同班同學》，再憑《骨妹》提名金像獎最佳女配角。最近她跳入公仔箱參演ViuTV劇集《地產仔》，劇中穿西裝女扮男裝，變身美男子，引起不少迴響。一步步走來的演員路，雖然有不少辛酸，但對演藝工作充滿熱誠的她表示：「希望建立只要見到『廖子妤』三個字，就係表演嘅保證。」
外表帶點冷酷、平日愛以中性風格示人的廖子妤現年30歲，今次在《地產仔》飾演愛作男性打扮的地產代理「魚哥」，造型官仔骨骨，為了演得入型入格，她在表情、語氣各方面都下了不少工夫，「好多人覺得我比較中性，但我唔係特別男性化，係一般女仔，唔算特別斯文，識講粗口，對我嚟講都算係推倒重來，重新建構一個角色。由行路姿勢開始，譬如魚哥把聲，我想專登拉低，但一唔記得就會飆高咗，呢啲位拿揑，又或者同每個人講嘢嘅方式，要重新度過係有難度。」
拍攝充滿歡樂
劇集主要由新生代演員擔綱演出，包括胡子彤、吳肇軒、余香凝等，Fish分享整個拍攝充滿歡樂，「因為我哋本身私底下已經好friend，變咗唔需要特別培養感情，一嚟就開始磨，撞出一啲新嘢。」由於感情太好，加上幾位男拍檔搞笑，所以拍攝最辛苦不是討論怎樣拍 ，而是需要經常忍笑，「大家全部『焗蟹』焗到膊頭係咁震」，問到會否因此經常NG？Fish就突然認真起來，「我還好，因為搞到我，我會𤷪，所以大家都唔敢搞我。」
除了一眾新生代演員，劇中還有久未在港拍劇、現已長居馬來西亞的鄭浩南，Fish與他有不少對手戲，大讚他友善、有型，更即興模仿「浩南哥」的語氣表情，發揮搞笑本色，「佢好鍾意同我哋分享以前香港電影好輝煌嘅歲月，佢係點樣經歷，又或者演戲心得，同埋佢知我係馬來西亞人，佢𠵱家長期定居當地，就會同我分享有乜好食，問我有冇去一啲地方。香港𠵱家對我嚟講比較熟悉，我哋好似對調咗身份，所以份外有親切感。」
尋找更多出路
來港打拼八年，過程中的辛酸、寂寞，Fish輕笑嘆出一句：「唔好提喇！」她說：「其實就算以前到𠵱;家，每一個演員都有辛苦嘅過程，唔辛苦好難做到演員，因為我哋需要真實經歷，可以借用喺表演上面，所有經歷，無論係離鄉別井，好多時候好孤獨，或者一啲不愉快回憶，對我嚟講都係好事，豐富咗我嘅表演，所以我都幾感恩，所有好同壞嘅經歷。」Fish當年隻身來港，現在總算有了一種安心感覺，「𠵱家租咗一間屋，有自己嘅小天地、自己嘅貓，自己嘅朋友，人都係孤單需要面對自己，我有時都幾享受呢種孤單。」
作為演員，往往都是被動，Fish雖然喜歡演戲，但也希望為自己尋找出更多路向與可能性，「我希望做演員做到老，但現實話畀我知唔得。」本身修讀剪片的她成為演員前，希望做導演或者幕後工作，最近她積極重拾了這方面的興趣，希望與朋友合作拍攝一些短片，嘗試做導演，或者剪輯，一些小型創作，「我都一直搵緊可能性，演員可以一直做，如果好彩有人搵我拍戲，都想睇吓自己可唔可以做到一個好嘅創作者。」
撰文：陳蔚渝
攝影：郭賢興
化妝：Cheryl Lee
髮型：Zap Tang
更多精采時尚內容，盡在 http://add.appledaily.com。