美國總統特朗普噚日宣佈針對北京在港實行港版國安法嘅制裁措施，其中一項係着手中止同香港嘅引渡協議。呢個做法對港府相信唔係好事，但對一啲人嚟講又可能有好處，好似知名經濟學家張五常咁，2003年因為俾美國政府以涉嫌逃稅通緝，走咗去同美國冇引渡協議嘅大陸住，一直冇返香港，如果美國中止同香港嘅引渡協議，張五常咪可以返香港？不過佢嘅朋友話，即使係真都未必會返嚟喎！
老友：住慣大陸未必返
雖然新一代對張五常未必有印象，但上一代行走中環或者學經濟，點都讀過下佢嘅文，又或者佢嘅書，例如《賣桔者言》，不過同張五常私交甚篤嘅學者、美國克林信大學經濟系副教授徐家健相信，即使美國中止同香港嘅引渡協議，張五常未必會返香港，徐家健話張五常由2003年開始喺大陸住，其實已冇乜必要返回香港，又話佢喺上面住得幾舒服，尤其係咁樣返落嚟，都唔係話法律上或者驚咩，係費事啲media篤住佢，話幾廿歲人點都怕煩嘅！
咁張五常又會唔會嚟香港同朋友敍舊？徐家健話都未必會，因為從來都係啲朋友自動上去搵佢，熟嘅朋友會上去搵佢，上去都好方便，仲話張五常當年已重申自己係無辜，不過外人未必同意，所以估計張五常會避免嚟香港，唔想又再挑起舊事。
其實即使美國中止同香港引渡協議，亦唔代表畀美國通緝嘅犯人可以百分百安全嚟香港，大律師陸偉雄就同八方講，成件事要視乎美國係咪永久性中止協議，特別係如果當中牽涉政治因素，唔排除當政治情況有變，又或者遲下政府換屆，美國政府又重新恢復引渡協議。
李八方