素有「英超小強」之稱、一到季尾就會瘋狂搶分嘅護級狂魔韋根，雖然喺2013年從英超降班，但為咗護級「遇神殺神、遇佛殺佛」嘅本性冇變。周二英冠主場對侯城嘅韋根，半場大開殺戒領先7:0，爆出1,000倍嘅「主其他」半場波膽。下半場韋根再入一球以8:0屠殺侯城，創咗隊史最大勝仗紀錄同追平咗英冠最大勝仗紀錄外，最重要就係扣咗12分都仲有機會護到級。