香港各區連日出現不少肺炎確診，大家又試進入緊張狀態，對餐飲業來講，最無癮就係恢復限制每枱人客人數，由不限到返回8人一枱再回復4人一枱，西餐廳大概影響不大，中餐廳就叫苦連天，因為聚餐慣咗一圍坐12人，好少坐8人嘅啫，上到陸羽飲茶，夥計話不少晚飯飯局即時取消，本已逐漸恢復正常嘅晚市，又吃一棍，根本無法預知何時可以恢愎正常。
究竟每圍坐12人與坐8人4人，有乜分別？坐12人就會令病毒傳染機會增加若干個百分點？相信袁國勇亦答唔出。最近啲確診，有水泉澳群組、慈雲山群組、的士司機群組（彬記與新發）及安老院群組等等，似乎皆與12人一圍吃飯無關；疫情之下有過家庭火鍋群組，但眾人齊吃吃火鍋較不衞生，人所共知，而在酒樓酒店吃中餐，12人一圍，可以夥計分菜，可以有公筷，至今不見有疫情群組出現。港式茶餐廳比較容易傳染病毒，其實與餐廳清潔度，地方細小，枱與枱之間距離太近，根本無法執行社交距離1.5米有關，若警察加強巡視，唔係巡一不巡二嘅話，好多街坊粥飯店與茶餐廳根本不能開門營業，咁又出現一個「病死還是餓死」嘅問題。特區政府若有心思，肯仔細考慮，並多貼吓地氣嘅話，應該分級限制每枱人數，譬如酒店、大酒樓、會所可以每枱限制人數為12至14人，中型餐廳每枱限8人，微型餐廳（香港多的是）每枱限4人，總人數為最高容量之6成，如此一來，對投資大嘅大型食肆與酒店先至公道，依家一刀切，既無助於控制疫情，卻有害於餐飲業，只係反映到林鄭特首與陳局長思想懶惰而已。政府若有數據證明12人一席比8人一席、4人一席更會增加播毒機率，不妨公告天下，否則市民點會服氣？
再講番點解香港曾有近50日零確診之後（非連續性），突然出現第三波？現在多宗確診源頭不明，不知第三波（即自7月7日開始）之零號病人如何染上病毒，於是難以追尋病源。以後一年，香港人乃至全世界人，仍將生活於不穩定疫情狀態，冇法子計劃大型社交活動或公眾活動（例如音樂會、戲劇），消費性經濟好難復原，Ｖ形反彈喎，純是炒股空想。