兩辦喺民主派初選結束後，先後發聲明話初選係對選舉既非法操控，違反國安法。唔少民主陣營睇完聲明，不禁苦笑，9月選舉都未開始又點樣操控選舉呢？初選這回事，目的係整合出選名單，決定邊個可以出選，八方翻查資料，發現建制派主要政黨都曾經就立法會選舉進行初選，民建聯仲試過喺2016年一連四日高調進行初選，咁又算唔算視法律如無物？
117個區議員「一人一票」
兩辦教識我哋，基本法同選舉法均無「初選」同「公投」制度，任何團體同個人自行組織呢類選舉，不但無法律效力，仲係非法的。八方睇返民建聯喺2016年舉辦嘅「非法初選」，有成117個區議員「一人一票」，選出由葉國謙讓出嘅立法會區議會（一）界別接班人，最後劉國勳成為「票王」，最終「非法」進軍立法會，穩袋約五百萬的薪酬。
至於選舉協調，畀邊個出唔畀邊個出，政圈皆知建制派仲勁過民主派，大家仲記得漁農界立法會前議員黃容根？佢2016年高調退出民建聯，挑戰漁農界何俊賢，政圈一直盛傳，黃容根2012年係不情願地交棒何俊賢，四年後自然想重新坐正，但民記同西環一直唔騷佢，一怒之下直情退出民記。鍾樹根2016年立會選舉淪為棄根，只排名單第二，政圈一直相信背後係西環發功，為保其他候選人而放棄Tree Gun。所以講到「操控」參選名單，建制叻過泛民喇！
李八方