車路士同李斯特城上周輪流大敗，曼聯以為今鋪發達，周一只要贏到修咸頓，就可以壓過2支藍軍上英超積分榜第3，點知復賽後同樣成績唔失禮嘅「聖人」真係做架樑，補時6分鐘由奧巴菲美射入扳平2:2一球，令領先嘅紅魔空歡喜一場，而呢個失球仲令最貴中堅哈利馬古尼出醜，俾人笑係曼聯嘅「爆炸頭」大衛雷斯。
對修頓臨天光失兩分
修咸頓繼之前爆冷1:0贏曼城後，今場又踢出一場代表作，先喺12分鐘靠史超活岩士唐開紀錄領先。紅魔喺呢個失球中，中場保羅普巴絕對要孭鑊，就係佢喺後場失誤被對方偷走腳下球失波；但唔緊要，曼聯近期前線有態，比賽去到20至23分鐘期間，拉舒福特同安東尼馬迪爾好快就幫佢哋將比數反超前，然後就維持呢個比數去到差唔多完場。修咸頓突然喺最後一擊嘅角球攻勢中得手，由奧巴菲美接應碧拿歷克頭槌助攻近門建功追成2:2，令曼聯要嘔番兩分出嚟，而且喺聯賽榜亦無法升上第三，同李城一樣得59分，仲因為得失球差輸蝕繼續排第五。
領隊蘇斯克查賽後都實話實說，承認以球隊周一嘅表現嚟睇，唔值攞三分：「修咸頓係一支好球隊，佢哋不停咁跑同追波，至於我哋就經歷最差嘅失波時間。我哋喺嘅防守本身都唔差，直到呢個完場前一刻嘅角球，就真係太令人失望。」
車李曼爭兩張歐聯飛
蘇B講緊嘅失望，可能就係指隊長哈利馬古尼。事關當時呢個角球，隊友雲比沙卡本身「嘜」實對方球員，點知角球開出後，馬古尼疑似因為掛住望天，突然衝前捉住咗雲比沙卡，結果佢兩個都因為判斷錯誤、起跳唔到解圍下，皮球落到尾柱俾奧巴菲美射入。賽後英國網民紛紛恥笑馬古尼，有網民戲稱呢位轉會費高達8,000萬鎊嘅中堅，係「大頭版、貴價版嘅大衛雷斯」，亦有人稱佢表現就好似一位「酒吧球員」，同效力利物浦嘅第一中堅華基爾雲迪積克冇得比。
由於曼城周一成功推翻歐洲足協嘅禁賽判決，下季可以繼續參加歐聯，所以家陣想以英超第五身份晉身歐聯已夢碎。以目前形勢去睇，除曼城同封王嘅紅軍已經攞到歐聯入場券，另外兩張就會係車仔、李城同曼聯之間嘅爭奪，而第6位嘅狼隊因為落後紅魔4分，餘下三場波想後上壓過佢哋已經好困難；紅魔同李城會喺煞科戰正面交鋒，基本上呢場波到時肯定就係生死戰。