【姐匙Talk】「念念」不離棄身家縮水男友

經濟低迷加埋武漢肺炎，呢兩個巨浪打埋嚟，市面一片冷清，唔止打工仔失業，就算老闆級都頂唔順，唔少店舖都被迫結業，甚至有啲富豪都身家大縮水，好似「念念」嘅富商男友「X先生」，那些年賺咗千萬桶金，喺東南亞好多地方都有生意，喺各地都有行宮，派頭十足。

冇交酒店房租

雖然X先生喺香港有一棟超級豪宅，但聽聞佢喺港島區某間高級酒店，長期租咗幾間豪華套房作為行宮，閒時鍾意同屋企人去住吓玩吓，有時又可以用嚟招待來港玩嘅朋友或生意拍檔，生意朋友住得舒服，傾生意都會順利啲；不過，聽聞X先生原來已經幾個月冇畀房租，酒店追完一次又一次，由於X先生有頭有面又係長期客仔，酒店都通融咗幾個月，但結果X先生都係冇交租，最後酒店惟有收回幾間套房，請走貴客。

至於念念自從成為X女郎之後，9秒9極速逃離娛樂圈，專心做一個聽教聽話嘅乖乖女友，成功力保X女郎地位多年不變，雖然X先生最近身家大縮水，但都冇聽聞念念有離心，似乎兩人相處多年有真感情，可以共富貴之餘，亦可以共患難，唔知X先生會唔會被打動，畀個正式名份念念呢？

撰文：Jessie
本欄逢周三刊出

【姐匙Talk】
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。