香港足球代表隊前翼鋒陳志康（Cow sir）去年加入足總董事局，是首位進入足總最高管理層的前球員。出任董事未足一年，碰上審計署揭足總管治崩壞醜聞，這位紅褲子出身的名將承認足總管治差劣，方向不清，傳媒報道是事實，直言有董事對足球認知不足。他說：「既然問題已存在，𠵱家應聚焦點樣重整足總。」縱使他在足總董事局屬少數派，幾乎是孤軍作戰，但既已沒有退路，便要幫理不幫親。
記者：曾雁平
攝影：禤家民
足總董事局去年改組，曾為太陽飛馬總監的陳志康當時集中於青訓工作，並轉戰商界，但去年獲推舉加入董事局，獲兩派支持，順利以與球會有聯系董事身份入局，上任不久除加入足總不同委員會，還走上最前線，為足總舉辦的公眾諮詢中向球迷及持份者簡介「2025策略計劃」。
不過，4月底審計署公佈的第74號報告書狠批足總，揭開足總混賬與崩壞的序幕，傳媒其後紛紛狙擊足總，進一步展示足總管治崩壞，足總高層到立法會帳目委員會公聽會為混賬解畫，怎知越解越亂成笑話，還被帳目委員會指足總管治「冇規冇矩」。
望更多紅褲子入局
Cow sir透露，足總去年換屆，有球圈中人提議推薦競選，結果在未有反對下入局，他說：「過去幾季集中青訓工作，一直有留意本地足球情況，既然有咁樣嘅機會，又唔抗拒入局，自覺算係合適人選，可以幫吓手，就好快應承出選，最後唔使經投票就入局。」
其實外國早已有球員出任洲份足協或足總管理層（見另文），個別更加出任高職，陳志康也同意足總可更早讓球員入局：「足球發展需要熟悉足球嘅人協助，外國有好多前球員喺足總畀意見，而香港足總確實算遲，但以我個人嚟講就未算遲，希望之後有更多紅褲子喺董事局內。」
Cow sir入局後除參與董事會，還任多個足總事務委員會成員，在不同範疇為足總出謀獻策，只是說服局內對足球認知有限的董事接納其意見並不容易。「各董事喺所屬領域係有佢哋嘅強項，但喺足球上，唔係話認叻，確實好多嘢要球員出身先睇到，會上提出意見，需要大家同意先可通過。」
「董事要睇波要開會」
「我唔知道董事係咪有入場睇波，可能有啲董事未必睇太多賽事，其實作為董事，港隊賽事要睇，港超聯重要賽事都要睇。每位董事都有責任，大家要知道每個會都關乎香港足球、港超聯同港隊發展，作為董事有責任開會，擔任呢啲公職係義務，都有責任做好，事實上，足總董事係協助香港足球發展，好宏觀係大職務。」陳志康說。
足總是獲政府資助的半官方機構，被審計署以強硬措詞狠批後，無論如何也要公開認錯，受薪高層不可能留下，但足總僅以213字輕輕回應報告，多少反映這個全港最大的體育總會，原來可以如此敷衍。陳志康指事情已發生，足總現在的應對似不足夠，確實要設法好好處理問題。
足總的新五年計劃，即「2025策略計劃」公佈前，大搞公眾諮詢，希望改變公眾對足總的形象，怎知審計署的報告狠批足總及港協私相授受，甚至黑箱作業。陳指新五年計劃推行前進行公眾諮詢，是希望全港700萬人也知道足總的發展方向，但報告指足總管治存在問題，透明度不足，很多未符合指標及要求，行政混亂，Cow sir更指傳媒報道全部也是事實。
嘆無人協助貝鈞奇
陳志康說：「報告所指嘅問題未必係現有問題，但足總高層確實有責任交代，尤其係受薪職員有責任幫手，𠵱家好似冇人協助責任心重嘅貝主席（貝鈞奇），等佢自己挺身而出，足總處理確實可以做好啲。事情發生咗，大家係時候放低，加強透明度將目標放遠啲。以衝向2034世界盃決賽周作為目標，這計劃確實係比較宏大同困難，但有目標總好過冇，睇點樣有效執行，包括先建立以短傳為主嘅香港風格足球，唔係一時三刻可實現，要由青訓開始，但無論點都要有長遠目標、清晰方向，點樣提升港超聯價值，令電視播影權有價，而唔係𠵱家咁球會畀錢播波，呢方面足總需要幫手解決。」