價值八億公帑嘅銅芯口罩項目，一隻連官員都唔想戴嘅「阿婆底」，經過連月派發，八方好想知究竟仲剩幾多？於是去問創科局900萬個口罩派晒未，原來仲有近300萬個未派出，有幾受歡迎，唔使八方講。
計劃派第二輪
呢款「改良」過程神秘嘅銅芯口罩，除咗個改良「專利」受質疑，測試又發現洗過後會滲水同過濾率暴跌。八方喺街頭所見，十個市民冇一個係戴銅芯罩，而創科局話有逾393萬人登記，另外又經郵局、社福機構、住宿院舍、小學等派咗216萬個，計埋有成609萬市民拎到口罩，八方都覺得好驚訝，即係好多市民拎咗但唔敢用？
至於剩低嗰接近300萬個，政府會點處理？林鄭前兩日又話會考慮派發第二個，咦！第一個冇乜人用，畀多個又有乜用？仲有，原來口罩嘅八億預算至今仲用剩好多，咁林鄭係派埋餘下嘅口罩就收手，定一直派第三輪、第四輪，直到使晒八億為止？話時話，全港得750萬人，點解一開始要整900萬個阿婆口罩呢？