民主派初選市民參與情況遠超預期，作為主力搞手之一的戴耀廷揶揄自己跌碎晒眼鏡，因為佢本來都以為，投票人數連基本門檻都未必達標。
初選撞正牛一
有連登巴絲前晚就喺初選完咗之後出帖，形容被左報叫做「戴妖」嘅戴耀廷有料到，因為由佔中、雷動、風雲到今次35+，似乎全部都係破局之作喎！
究竟今次35+目標點樣埋單，暫時只係過咗首關，所以仍然需要香港人繼續齊上齊落。不過初選成功呢個香港人嘅奇蹟日，原來同時係戴耀廷牛一，係佢56歲生日。
八方問過戴教授，佢好開心話呢61萬投票人數，的確係佢收到最好嘅生日禮物，而星期日亦有一班義工為佢準備咗生日蛋糕。
雖然蛋糕切咗，但戴教授就話家陣仲未可以輕鬆慶祝住，因為初選結果仲未出爐，加上之後仲有協調工作，所以應該會等遲啲先能夠同家人出去慶祝啦，問題係現在疫情再爆，甚至可能暫時都唔可以出去食飯住。