經過民主派初選投票，大家除咗睇到香港人「真係好x鍾意香港」外，其實亦都睇到，香港人除咗出力，亦好願意出錢支持民主。
區諾軒：好似神蹟咁
話說喺剛過去嘅周六、日，發起民主派初選嘅戴耀廷、區諾軒以及民主動力召集人趙家賢，初選前已發起眾籌，全力為今次初選活動撲水，但可惜到初選首日，所得捐款其實距離350萬元嘅目標，差成100萬！原本以為初選條數唔知點找好，點知戴耀廷前晚約8點喺facebook出post，呼籲大家要「捐錢！捐錢！捐錢！」後，只需大概三個幾鐘，眾籌就極速達標！
區諾軒同八方講，前晚睇到眾籌達標後，不禁驚嘆：「好似神蹟咁」，話得悉呢個喜訊之時，正係佢晚上就初選問題接受記者訪問之際。佢又話，對於眾籌達標鬆一口氣，因為若未能達標，相關嘅開支就可能就要由各參選團隊分擔嘞。其實參加初選團隊都冇乜錢，如果呢100萬由各團隊夾，即使每人幾萬都係一個負擔，𠵱家各方終於可以鬆一口氣！
根據初選計劃早前公佈，今次眾籌所得嘅錢，會用喺初選嘅事前宣傳、初選投票站場地（全港大約100至150個）嘅租金同設備、電子投票系統及器材，以及事後民主派35+公民投票報告嘅編撰等等。
李八方