樂瞳加入娛樂圈已有十多年，2011年在《點解阿Sir係阿Sir》中演反叛學生妹令人刮目相看，可惜與獎項擦身而過，她坦言那刻的確感到失落。她大前年選擇離開TVB往外闖，上月投資六位數在網上搞賣酒生意，放下藝人身段親力親為，雖然辛苦但得到莫大滿足感，更希望藉此創出事業高峯，彌補當年輸獎的失落。
現年33歲的樂瞳在2007年加入TVB，大前年離開向外闖，近日經營網上賣酒生意，問她會否慶幸離開才得以多方面發展，如創立賣酒生意？她說：「我係多謝TVB，因係咁大嘅平台大家先認識我，唔係大家可能唔知我𠵱家賣酒。」其實在TVB多年，樂瞳曾有些演出深受讚賞，但可惜始終未有得獎，可會是遺憾？她謂：「又唔可以咁講，2011年嘅《點解阿Sir係阿Sir》提名飛躍進步女藝員，最後冇獎係有少少失落，不過之後都有唔少機會，好多嘢係際遇、命運同timing，咁我希望𠵱家賣酒嘅事業可以有另一個高峯。」
「𠵱家有女人味」
樂瞳天生baby face被限制戲路，她聞言笑說：「但有網友話我老咗好多，其實𠵱家都有女人味，已唔係baby face，始終都唔年輕，人生去到唔同階段有唔同味道。」對於近日TVB要求藝員簽一年六騷合約，但年薪只有12,000元難以維生及有欠尊重，樂瞳未有太多意見：「每個人合約都唔同，唔識評論。我都仲有好多朋友喺TVB，佢哋都多咗機會，每個人目標唔同。」她自言仍有劇癮，不過TVB暫未有邀她回巢，反而她將為另一電視台演出真人騷，但暫時未能透露詳情，她只說：「大家從來未見過我呢一面。」
樂瞳賣酒，但原來「酒齡」甚淺：「我都係幾年前先開始對酒有興趣，當時同朋友去飲，都唔知飲咗乜，想深入探討，加上去旅行有去酒莊，我第一個去嘅係喺意大利西西里嘅酒莊，見到真正葡萄園，返嚟就好想去學酒。」隨後她便報讀葡萄酒課程及考獲品酒師牌，因而結識不少志同道合的同學，及後他們更鼓勵樂瞳創業。
見翻頭客當有賺
其實今次並非樂瞳首次做生意，去年中她已在網上賣健康美容產品，所得經驗令她想搞其他生意，去年尾開始籌備賣酒，但甫開始便撞正疫情、封關等問題影響入貨進度，又要兼顧前期工夫如包裝、印卡片等，甚至連包裝紙厚薄都要顧及，幾乎一腳踢，但樂瞳謂：「係開心嘅，其實比自己叻嘅人好多，我只係想以一個wine lover身份同大家分享，主要賣親民嘅酒，即係daily drinking，攞住幾百蚊可以為你揀好飲、性價比較高嘅酒。」
雖然上月初才開始賣酒，但反應理想，樂瞳說：「已經有唔少客支持，有兩支酒賣到斷貨，𠵱家要不停入貨。之前真係保守咗，怕賣唔晒。」她坦言未計數，不知生意額及實際收入如何，但有翻頭客，亦有來自馬來西亞的客人，她謂：「如果唔好飲啲人都唔會再買，所以對我嚟講已經賺咗。」現時樂瞳事事親力親為，親自覆客及送貨，她說：「雖然好忙，但𠵱家有一個好充實嘅生活，以前喺娛樂圈冇呢個體驗，嗰種滿足感好唔同。」
撰文：寶妮
攝影：仇志德
髮型：Jay of Hair Festival Walk
服裝提供：MZJJ
場地提供：Amelia of Habour City