螞蟻銀行忽然通知客戶，宣佈將重推銀行新賬號，提醒客戶需自行在其他銀行重新登記，並預告7月20日至22日起一連三日晚上10時至11時作系統提升。
日前收到正在試業的螞蟻銀行發出的訊息，話銀行7月22日起，提供一個「11位數」新賬號以取代舊賬號，作存款轉賬之用。
杜夫人曾寫過，螞蟻銀行賬戶號碼連計銀行代號（bank code）超出常人預期，竟長達「19位數」，而本港銀行賬戶一般是11或12位數。當時星展網上轉賬的系統支援唔到，客戶無法轉賬去螞蟻銀行。
轉賬唔到，虛銀咪即係自廢武功，當日都係隨口講兩句，從無想過文章有何迴響，畢竟，螞蟻搞金融科技頂瓜瓜，凡人又豈能參透箇中深層意義。在這個前設下，夫人收到這訊息極為意外，因為件事終於合理返，唯一係客戶需時再到其他銀行重新登記。
另一件事要分享，上期講到「延後享受」的問題。聽返嚟，匯立銀行都有意將發放獎賞的時間縮短。最理想嘅，當然係可以於定存到期日同時發放獎賞，夫人相信系統都唔難support嘅，始終對呢間本地薑有多一份寄望！
有人話，杜夫人唔夠fair，「延後享受」的問題其他銀行都有，仲要已經存在好多年。嗯，的確係咁，舉例建銀亞洲7月推咗個客戶推薦計劃，每推薦一位客戶開戶兼達指定條款，最多可獲獎賞1,500元，計劃將於9月底完結，而存入獎賞則要到明年1月31日或之前，比起匯立銀行更加不合理。
今日的社會太離奇太不合理，杜夫人每日都反覆問自己，香港人的心理要多扭曲，才會只遇上一些正常事，就激動流淚或者覺得安慰。或許有人擔憂泛民初選有違最惡國安法，得罪上大人，令人欣慰的是，港人仍未放棄。
杜夫人
http://fb.com/mrsmarydoo
本欄逢周一刊出