土木工程拓展署於去年10月發表的《元朗橫洲其餘公營房屋發展的工地平整及基礎設施工程--可行性研究》報告中，顯示整個橫洲發展的完成日期為2033年，本土研究社成員陳劍青指出橫洲發展早於上世紀70年代已開始，港英政府研究收回元朗工業村附近的土地並納入發展範圍，但後來因為風水問題擱置。
「當時呢個範圍唔多棕地，𠵱家整個地區破壞晒，已無風水理由，由1978年至2034年足足半個世紀，仲耐過喺海中心起個島，淨係喺棕地做樹木普查就要用三年時間？拖咁耐，好唔合理，畀公眾一個感覺係無心做，現屆政府就可以唔使處理」。
團體：對綠地開刀 倒行逆施
2012年，政府開始研究發展橫洲33公頃的地皮，當中包括北面的棕地以及南面的綠化地，而屏山鄉事委員會主席曾樹和管理的停車場亦在此棕地範圍內，佔地18.5公頃，及後政府向地區人士「摸底」後，暫時放棄收回棕地，卻對準綠化地開刀，就是即將面臨收地的橫洲三村。計劃亦由原本興建1.7萬戶公屋，大幅削減至4,000戶。
陳劍青指出當中不少棕地的租約是以一元出租的，然後再由租客以幾倍價錢分租出去牟利，「呢班包租者係最大得益者，例如20公頃棕地再分租出去，一年賺成億，呢班人無地權只係二房東，咁就無本生利！查冊後發現呢班人好多都係當區嘅鄉委會成員，世上邊有咁好嘅生意㗎，全世界應該只有橫洲做得到」。
選擇多人居住的綠化帶非原居民社群為優先發展的地方，陳劍青解釋不是沒有土地，而是「如何選擇」的問題，刻意避開權貴、犧牲無地權者，他認為橫洲堪稱香港土地發展最經典例子，「最理想應該係先發展棕地，保留綠化地，第一可以即時滿足房屋需求，亦能解決已破壞土地嘅亂象，𠵱家倒行逆施」。