民主派初選進行第二日投票，前日首日已有23萬人投票，最終更有逾61萬人投票，牽頭搞初選嘅港大法律系副教授戴耀廷都形容踴躍程度真係令人跌爛晒眼鏡，唔知早幾日恫嚇市民初選係違反國安法嘅政制及內地事務局長曾國衞，見到周街咁多人投票，佢副眼鏡又戴唔戴得穩呢？
岑敖暉目擊「八成肯定」
初選超區參選人之一嘅岑敖暉前晚喺社交網站facebook出Post（圖），話去緊堅尼地城街站途中時經過中聯辦，見到疑似曾國衞喺中聯辦出嚟，不過佢就話真係影唔切，所以冇圖，但佢都八成肯定車上面嗰個係曾國衞，岑敖暉話有冇記者朋友可以查證下？質疑唔知係咪因為太多人出嚟參與初選投票，搞到局長要俾人捉去照肺？
八方問過政制局情況是否屬實，局方回覆話，對呢啲「網上誤傳」不予置評，又話政府一向唔會透露或者評論政府官員行程日誌。咁又係嘅，呢個係唔講求民意同資訊公開嘅社會嘛。不過今日香港人可能都忙住排隊，唔得閒理局長做緊乜，反正即使局長出嚟再噏更多嘢，都改變唔到幾十萬人出嚟投票嘅事實，即使佢真係俾西環照肺，怕且佢都冇聲出喇！
李八方