本港大企業集團有好多專才，但素來無政治顧問之設，即使有研究部，都係負責經濟、地產、投資研究，好少做埋政治分析。傳統上，香港大企業盡少涉及政治，港英時代，政府高官刻意與商界保持距離，大企業亦甚少主動約高官吃公關飯，頂多係透過商會向政府提交意見。
九七後，政治逐漸打到埋身，曾有兩個大集團搵報章南華早報嘅前政治記者做主席顧問，為時事分析提交意見，大集團有公關老總兼職做埋政治情況資料收集，至於決策，當然係大老闆之事。
梁振英做特首開始，特區政府對政治有興趣過發展經濟，大集團想唔同高官打交道都唔得，有埋西環插手之後，政治行先過經濟，更是明顯，好似今年七月一日實施國安法咁，迫得大企業唔小心研究政治唔得，國安法影響全港每一個市民，決非林鄭月娥口口聲聲講：只影響極少數人。
好似7月7日實施之執行國安法細則，已令FB、Google美國科技企業等發表聲明，暫停向特區政府提交資料，FB有WhatsApp，Google有YouTube，現在警察有權向社交平台索取資料，刪除「有害」訊息，仲唔係影響到香港所有人？
呢日左丁山與大集團公關吃午飯，A君話佢向一啲同行吹風兼攞料，得知國際大企業對國安法持觀望態度，睇吓政府來勢如何，但到咗7月7日，大企業開始恐懼香港會失去訊息流通的自由，如何應付是好？Plan A本來係留港繼續營運，Plan B係假如香港Ban咗Google、FB、WhatsApp，香港就是另一個中國城市，相比深圳、上海再無資訊自由流通優勢，到時要全面使用VPN，加強網絡保安，猶如身處深圳上海。再假如香港失去司法獨立，李國能、馬道立畀北京芝麻綠豆人物罵個不亦樂乎，就可能啟動Plan C，全面撤出香港。林鄭月娥再做多幾年，香港走向一國一制，本港藍絲建制派會唔會搵到銀紙，進入收成期呢？睇怕難啲囉，到時上海北京深圳金融機構及人才全面佔領中環，仲要非我族類做乜？