早前喺多位名人力撐下宣佈代表民主派出戰體育、演藝、文化及出版界嘅周小龍，噚日朝早9點去咗旺角黃店「阿木台灣麵」做票站義工，原來佢係應男拔萃師兄、油尖旺區議會主席林健文邀請落場，因為黃店正喺林健文選區。
話初選反映淺藍都變黃
周小龍話今次初選對香港非常重要，投票數字已清晰反映香港民意，就係國安法不能牴觸香港人嘅價值觀，「就係話畀政府聽，全港巿民都要求有言論自由、新聞自由、創作自由」。佢又認為投票數字已反映，即使社會「淺藍」嘅人都開始向正確方向投票，「我自己都係藍變黃嘅人，我諗越來越多人會用投票嚟表態（支持民主派）。」佢呼籲體演文出界選民用良心投票，「繼續盲撐一啲做唔到嘢建制派嘅話，香港係冇好嘅出路嘅！」
對於舖頭因為擺放「民主女神像」不被商場續約，佢話都係好事，發現舖頭因此好多人幫襯支持，希望政府睇到呢種民意。由13間變12間舖嘅佢希望業主唔好政治打壓支持民主嘅人，希望啲業主都醒嘞，「睇埋今次嘅初選，睇到民意囉！」