合則來，不合則去。離開工作了21年的無綫，李忠希說：「好失落？其實我係冇！我已經睇到好化，雖然我到𠵱家都仲未係好出名。」
李忠希說，自己只是一個小演員。在他身邊的，是大明星。當年1996年歌星出道，同屆新人是陳奕迅、鄭中基；又正如他讀無綫訓練班，同班同學是林峯、楊怡。別人的比較，他早已習慣，「我覺得唔好比較，呢啲嘢唔係我想……際遇囉，唔好成日踩低人哋！我又未埋單，我又未退出娛樂圈，唔好成日覺得人哋唔掂，掂唔掂唔係你去衡量。祥哥（黎耀祥）捱咗十幾年，𠵱家人哋係視帝啦，我諗祥哥以前都係飽受白眼！」
在無綫浮浮沉沉，歌手出身去了做主持，其實最想拍劇做演員，「近呢幾年都叫做有人叫到我個名，之前十年我係叫做『東張西望』，你咪《東張西望》嗰個？我已經慣晒啦！」
小演員的自白：「各有前因莫羨人！」呢句最啱！
撰文：文嘉龍
攝影：林德雄
我係一個演員扮記者
李忠希說，無綫是好是壞都好，畢竟自己待了那裏21年，被轉合約變「一年六騷」，其實你情我願，沒有人用槍指住個頭簽。不合則去，只好自己走先，「講返20年前，另一個前輩同我講，曾江，你諗吓幾耐，佢同我哋講，你哋班𡃁仔，女仔就好啲，搵個男人嫁咗就得，男仔要養家㗎，唔好磨咁耐啦，兩、三年就好走啦！」
不計2012年曾轉投港視，李忠希在無綫經歷近20年時光，藝員訓練班畢業，他是名副其實的紅褲子出身，「𠵱家公司啲新人，大多數有家底，我唔知我有冇資格去講呢番說話，我見咁多小朋友揸架靚跑車，你份人工都唔知夠唔夠畀牌費燕梳！唔同我哋嗰陣時，真係入嚟捱㗎！我哋係搵食，紅褲仔出身，係TVB訓練班訓練我哋出嚟，實習半年、上堂半年，我哋真係紅褲仔！」
1999年的第13期藝員訓練班，李忠希說是公認最團結的，林峯、楊怡、楊明、徐榮、張美妮和趙永洪等人，去年20周年，林峯為每人打造了金牌。「有好多已經唔喺呢一行，TVB唔會頒一個20周年金牌畀你，阿峯話『得，我搞掂』，打咗個20年紀念金牌留為紀念！」
這班有今生冇來世的兄弟姊妹，誰紅誰霉都不影響友情，「我哋出到嚟大家冇分高低，你唔啱我出到嚟照鬧你。我哋好開心，唔會因為你紅咗，我哋唔識你，大明星出到嚟好似阿峯、阿怡都完全唔會擺款，完全冇！」
當年的林峯，只是旁聽插班生，「林峯一入嚟就知佢紅梗，佢係插班生，仲要簽經理人合約。佢本身做戲好好，佢有天賦條件；阿怡就係一個好勤力嘅人！我媽媽教我，各有前因莫羨人，我拍劇，我比佢哋遲咗十年㗎，頭十年去咗做主持，而又唔係一個正式嘅主持，我只不過係一個演員扮記者，你哋個個記者都話有晒記者證，我係一個演員咋！我只不過喺度扮記者，我成日都咁講，呢個係事實，我係一個演員扮記者！」
陳冠希指住我嚟鬧
加入訓練班之前，他的名字是李中希，是Sony唱片的力捧新人，出過一張唱片《太著緊》，加入無綫後卻做了《全線大搜查》和《東張西望》主持。「我相信當時監製可能見我歌手出身，適合去訪問番啲歌星，但係我今日同你哋講，其實唔係㗎！我記得我初初入呢一行，揸住支咪出去，都唔知自己做緊乜。」
曾是歌手，身份轉了要去採訪同行，他放不低，「放唔低就一定有，都唔知聽過幾多人會同你講，咦，忠希，你入咗呢一組呀！當時我年紀又細，我又冇經理人同我去fight，公司畀啲乜嘢你，你咪去做囉，盡量做到最好。《大搜查》其實我唔鍾意做娛樂，我鍾意做時事。」唔想見返嗰時班歌星？「我𠵱家諗返起都係，其實我都係人，頭嗰一年好難過，之後時間沖淡一切啦！」
有所不知，李忠希的表哥是太極樂隊成員唐奕聰（Gary），他18歲就當上表哥助手在錄音室工作，見盡王菲、黎明等紅星的錄音實況。「我唱片公司係Sony Music新力，我入去嗰時有黎明、張智霖；盧巧音都未叫盧巧音，叫Black & Blue（獨立樂隊）、仲有劉愷威，之後遇到翻版問題，同埋簽我返嚟嗰個人都走咗……你𠵱家Google就話知道我李忠希係唱歌啫，我諗𠵱家好多後生細路可能都唔知道我係唱歌㗎，直至《流行經典50年》先至勾返起好多人回憶，呢首歌好好聽喎，原來係你唱！」
當上娛樂主持，他口中演員扮記者的年代，他最深刻一次是被陳冠希指住鬧，「呢件事我都唔知好唔好提返，就係陳冠希指住我嚟鬧，佢好好火呀！我記得去訪問佢，人哋又係咁問，我TVB又係咁問，我記得喺洲際，佢嗰時同女朋友拍拖，佢係肯講嘅，我記得我問咗佢一句，佢就指住我嚟閙『你係乜嘢group㗎？你係邊一隊㗎？我以後never唔做你哋訪問，你返去同啲大嘅講，有邊個敢問我呢啲嘢呀！』我就話唔好意思！返到去畀監製睇，監製都讚我好忍得，冇即時同佢嘈，我話做嘢啫！公司好似喺嗰段時間封殺咗陳冠希！」
由主持轉型拍劇，李忠希說要感激劉家豪監製，「一直主持《全線大搜查》，跟住做到《東張西望》轉晒主持人，我先至出返嚟拍劇。我真係要再多謝一次劉家豪，我走嘅時候都專登拍佢門多謝佢！其實喺TVB你要生活、你要拍嘢，都要有監製肯起用你先得，每一個監製都有佢自己班底，家豪哥有一段時間都過咗去Now TV，我就喺HKTV，HKTV出唔到牌啦，我就返番去TVB，頭嗰兩年好難過，因為識我嘅監製都走晒，總之返到去就係冇乜嘢做，直到家豪哥返嚟，佢返到嚟每一套開嘅劇都有我，每一套角色都幾好，呢個係我最想感恩同埋感激嘅一個人！」
每個人都有尊嚴
單靠無綫一份收入難以維生，所以李忠希多年來有不少副業，開過火鍋店和酒吧，而保險一職更做到現在。2009年，一個月內遭遇連環打擊，「嗰時我未做保險，我又要交租，嗰陣未買樓，又要供車，壓力好大！我同陳小春搞咗一個新嘅板仔牌子，臨出之前投資方就話唔做，於是乎要sharp cut；我第二間disco就俾人穿櫃桶底，同時間做衫嘅生意冇咗、《東張西望》又冇埋，我一個月冇咗三份收入！一個月內三個打擊，我記得嗰時我去咗合肥做扶貧，去完返到嚟就話俾人穿咗櫃桶底，算係最低潮！」
經歷過最低潮，2010年李忠希與拍拖8年的空姐女友結婚，女兒今年已7歲。對於離開無綫的決定，李忠希說太太無限量支持。無綫的今與昔，李忠希說：「公司制度變囉，其實大家都睇到啦，廣告少咗好多，廣告係主要收入嘛，再加上市道環境因素啦！坦白講啦，我哋細個，六叔（邵逸夫）仲喺度嘅時候，嗰時公司係好有歸屬感，人情味唔同𠵱家！𠵱家管理嗰班朋友，佢哋淨係睇住盤數，我都做過生意，我都睇住盤數，但𠵱家真係缺乏咗人情味囉！」
小演員的卑微願望，只望公司能珍惜綠葉，「我成日都講，牡丹雖好都要綠葉扶持，有幾多個人做到一線，唔通你三個人做晒30集戲呀？我想公司可以珍惜吓我哋呢啲年紀嘅演員，如果冇晒我哋呢啲年紀嘅演員，真係斷咗層，唔係廿幾歲訓練班出嚟嘅人，可以做到𠵱家我哋做到嘅嘢㗎！我想公司珍惜一吓今時今日嘅演員，同埋我哋真係由佢訓練出嚟，我哋攞晒cert畢業㗎，唔係假㗎嘛！」
李忠希20年間見盡離合，早已看得開睇得化，「其實你冇得話唔睇得開，一係你𠵱家唔做啫，你要做，梗係要吞咗佢。你唔睇電視梗係唔知我係邊個啦，我夠唔識你咯，係咪先！我惟有咁樣駁返啲人囉！每個人都有尊嚴，你尊重我，我咪尊重返你囉；你唔尊重我，我唔會尊重你㗎，我絕對唔係一個俾人踩埋心口唔出聲嘅人！」
可惜殘酷的現實是，紅褲子出身的小演員往往是最不受重視的一群。「點解呢？Why？我有好多朋友都已經轉咗行，我都好想做演員呢份工，可以維持到我一家嘅開支，真真正正全程投入去做演員呢份工，可以做到尾可以做到退休，但唔係好多人做得到！我記得我去港視之前，有前輩同我講，忠希，你呢啲年紀，做多幾年，有得行就好行，如果唔係，到咗我哋呢啲年紀，50歲、60歲先至醒就太遲啦，冇晒競爭力，你轉唔到行。我記得好深刻！」
現在才走算遲嗎？46歲的李忠希說：「希望未算太遲！」有心不怕遲。
【後記】古老闆
一日未埋單，一日都未算遲。李忠希說，未來最想拍電影，他說拍電影的節奏最適合自己。主持拍劇唱歌電影的排位，重新大執位，電影現在排首位，「我真係想做電影，之前我拍林德祿導演、古老闆（古天樂）嗰啲戲。其實細個𡃁仔嗰陣，我都拍過電影，我同陳曉東拍《傲氣比天高》（1996年），好耐啦！之後就拍林德祿導演嘅戲，我覺得拍電影嘅認受性同埋被尊重性係好好囉！」
不過現在疫情市道之下，開戲有難度吧！「古老闆話會開十套吖嘛！」李忠希更叮囑記者，「你不如真係幫我提吓呢樣嘢，如果古老闆開戲，我真係好想有機會拍呀！」
小演員搵機會，最緊要面皮夠厚！
場地提供：AT Studio