往年呢個時候，大學已準備放暑假，去旅行。今年就係非常時期，本以為本地確診個案漸成過去，誰不知在7月7日後突然間社區出現幾十宗確診並涉及學生、家長、的士司機、安老院等等，幾出乎意料之外，令到本來好興奮嘅股市，如受一盆冷水淋頭，當日即時降溫。
幾時疫情先至過去，全世界恢復正常，只有上天知道，於是我地有乜做事計劃，都要有plan A，plan B，甚至plan X，以適應不斷變化形勢。簡單如考試，申請大學，都陷入一片混亂之中。公關E嘅姪仔A，讀書成績優異，今年九月讀中六，本想報考SAT，怎知香港試場已經爆棚，報名人士太多，姪仔A唯有報考台北區，10月要飛過台北考SAT。但到時是否要提前14天去台北隔離14天，尚是未知之數，多住台北14天，當然又係一筆費用。點解香港區咁多人考SAT？原來係內地考生早有準備，一早報晒名，香港考生動作稍慢，只能望門興嘆！點解內地生要嚟香港考？咪係因為內地考試出貓之風太盛，SAT索性取消內地試場囉，但內地考生是否能如期來港，又係未知數，事前無法估計。
考到試，申請大學成功，可否如期到美國讀書，則是另一個問題。今年八月能否去美國升大學，目前還是不明朗，美國政府聲言如大學用Zoom上堂，不發學生簽證。哈佛大學為之呱呱叫，與MIT聯手控告聯邦政府，哈佛講明新生可以入住宿舍，但上課用網上教學，學費仍然照收美元49653（好貴！），住宿新生要每三日測檢一次。名牌大學就話可以定下條件要學生遵守箒，三四線大學就慘情，收唔夠學生，學校點辦？近十年來，因中國學生太多，西方大學不自覺陷入過份膨脹毛病，一旦音樂停了，音樂椅上變空無一人，英國方面，就有13間大學面臨破產，據英國Institute for Fiscal Studies披露每年英國大學收入共400億英鎊，相等於英國國民收入1.8%，今年因封城鎖國，入學學生大減，有13間大學，過份倚賴國際學生交學費，首當其衝，面臨財困，需政府救援，否則破產。既有如此情況，難怪一啲澳洲大學高舉中文標語：「澳洲歡迎你」，以後班上有中國學生全部畀A啦！