馬主F話上星期三過得好愉快，因為入住尖沙嘴凱悅酒店一晚，付費1,750元，得回1,000元餐券，在Hugo或中菜廳吃晚飯，星期四早上食早餐，覺得好抵。現在本港酒店不論五星至一星，皆生意不景，入住率奇低，為咗生存，收番啲現金流，無不大減價嚟吸引本地客。一位旅行社副董事長對左丁山講：「郊外酒店最好生意，迪士尼及愉景灣酒店，常滿，海洋公園萬豪酒店，塞滿人，皆因郊外酒店有海外resort嘅感覺，去唔到東南亞日本咯，去吓香港郊外酒店當出外渡假啦，但城市區域內酒店就慘情咯，冇眼睇！」
冇眼睇都要捱落去，掙扎求存。呢日華懋集團非常罕見地請食飯，公關老手瑪嘉烈離開馬會後，被舊上司Sylvia捉咗去華懋幫手，呢日就安排集團執行董事兼行政總裁蔡宏興請食飯，蔡總裁本身係建築師，畢業於美國建築、設計名校Rhode Island School of Design，曾服務於諾曼科士打建築師樓，正是系出名門，與一般地產發展商比較，氣質上有所不同。華懋自爭產案完結後，已非家族公司，而係一間由公眾基金（非牟利）擁有嘅公司，政府還在安排基金會人事，但日常營運上已由蔡宏興主持大改革，傾力改變舊華懋形象，提出三重底線管理（Triple Bottom Line），務求對社會有貢獻，蔡總裁講到：「依家我地嘅項目水準高，軒尼詩道一號（前熙信樓）攞到幾個建築獎，德輔道中之華懋大樓（創興銀行在兩幢華懋之間）係甲級商廈，除咗利潤（Profit）外，我地同樣重視人（people，包括僱員、僱客、大眾）及星球（planet，意指地球）之福利，三個P構成三重底線，不厚此薄彼。」所謂三個P即係賺錢之外同時重視ESG，社會責任、環保與管治，聽就好聽嘞，華懋過去歷史，大家耳熟能詳，華懋樓總係以低於市價出售，原因大家心知肚明，以後睇蔡生表演嘞。飯後在如心廣場大堂，見到有人龍check-in入L' Hotel，乜咁好生意呀？Sylvia話佢地推出房租9,999元租一個月，幾乎平過劏房，大受青年男女歡迎，現時入住率有五成以上，此乃變則通嘅道理！