今年3月，歐陽巧瑩宣佈離開無綫，回復自由身在網上自由發聲，鬧教育局長、撐港人加油，有說她連累老公林師傑遭無綫掟入「雪櫃」，上月林師傑宣佈解約，原因是無綫提出一年六騷侮辱價，年薪12,000元根本不夠養家。兩夫婦日前一起接受《蘋果》訪問，歐陽巧瑩大談拍劇的辛酸，指難忍被迫唧胸及粗口問候，而離開娛樂圈後，她立志從政。
撰文：余燕儀
攝影：沈健程
歐陽巧瑩在2013年選港姐後簽約無綫，現年27歲的她形容在無綫七年生不如死：「我唔憎呢間公司，但絕對唔講得上鍾意，參加港姐係誤打誤撞，冇諗過攞友誼小姐，問番啲女仔點解投票畀我，原來係因為我一個人孭晒負面新聞。入行前貪玩，啲人覺得同男仔玩好放蕩。好辛苦經歷咗幾年，生不如死。」
「好唔尊重我」
入行後歐陽巧瑩獲安排主持《3日2夜》，她覺得開心：「台前幕後都係朋友，唔覺得難受，真正覺得要離開公司係拍劇，我接受唔到演第二個角色，亦接受唔到階級觀念，啲人覺得你唔係一線紅星。」
擁有34C火辣身材的歐陽巧瑩，於劇集《金宵大廈》中一場着低胸衫做瑜伽的戲，成為焦點，但其實她不滿不受尊重，被要求性感演出，她說：「記得拍某一部劇，要我性感啲，我胸前有幾多肉就幾多肉，點樣去裝去唧都得咁多，而且效果唔差，點解仲要當住咁多男人面叫我唧勁啲？對我好唔尊重，你哋咪封殺我囉。第二係拍某場戲，要跌落一個地方，我唔係動作演員，又着住吊帶背心墊唔到pad，要硬跌，做唔到我都冇辦法，但冷言冷語、夾雜粗口令我好唔舒服。我唔係話佢哋唔好，可能係呢個圈子生態，但自己接受唔到。」
離開無綫後，歐陽巧瑩比選港姐時暴脹二十磅，現在的她立志從政，四年後選區議員，爭取大麻合法化，對於志向被指離經叛道，她說：「近呢年明白香港重要，真心係港豬，97後香港藝術事業失望，直至睇完李卓斌導演的電影《G殺》，覺得有曙光。我想參選區議員，政綱想推動藝術。」
倡大麻合法化
至於推動大麻合法化，歐陽巧瑩說：「如果講醫用大麻就得，但講娛樂用大麻，就好多人攻擊我，話我譁眾取寵，sorry，我冇諗再做幕前。我想深入探討嘅係娛樂用大麻合法化，係咪可以令香港旅遊業提升番，我諗唔到如果我作為外國人，點解要嚟香港。」
化妝、髮型：BuBu
場地提供：谷Stage