早前宣佈懷孕的倪晨曦昨日在中環為有份投資的瑜伽體驗館開幕，邀得陳柏宇夫婦、陳奐仁、李靜儀等到場支持。由於疫情再度爆發，各人均戴上面罩抗疫，並不時噴消毒酒精清潔瑜伽墊。他們分組示範瑜伽動作，體驗館原定今年2月開張，但因疫情延至昨日才正式開幕，倪晨曦說：「租金方面，業主都有讓步，冇開嗰一個月，有減收25%租，雖然政府有資助，但都蝕咗5位數。我哋原定開嘅班，因為啱啱又收緊限聚令， 𠵱家要分時段上。」
現懷孕6個月的倪晨曦身形依然纖瘦，透露預產期是10月。她表示未有孕期不適：「我係冇乜反應嘅媽媽， 𠵱家希望順產，男定女得醫生知，因為我覺得男女都冇所謂，都係上天嘅禮物，所以我等到佢出世嗰刻先知。」倪晨曦坦言有意再生，婚宴則希望在明年1月舉行。