歐洲足協禮拜五為8月即將重燃戰火嘅歐聯8強抽籤，其中最矚目嘅對碰莫過於皇家馬德里對曼城一戰嘅勝方，將會遇上祖雲達斯對里昂一戰嘅勝方。祖記前鋒基斯坦奴朗拿度（C朗）有機會喺葡萄牙里斯本正面硬撼舊東家皇馬。另外，西甲班霸巴塞隆拿亦可能喺八強大戰復賽以嚟全勝嘅德甲王者拜仁慕尼黑，12支球隊中，五支贏過歐聯冠軍嘅球隊以及億萬大軍曼城同樣身處「死亡上線」，亦令處於下線嘅巴黎聖日耳門（PSG）迎來捧起歐聯獎盃嘅最佳機會。
二月初武漢肺炎喺歐洲大爆發，當時唔少歐聯比賽被指係散播病毒嘅元兇，結果UEFA三月中決定無限期暫停賽事，而上月中UEFA就拍板今季歐聯將會喺8月7日重開，先上演餘下4場嘅16強次回合，亦已喺抽籤前決定會照過去安排一樣，喺番原定地點踢埋呢四場波，以示公平，八強開始則移師到葡萄牙里斯本，賽制亦破天荒改成一場過分勝負。
C朗隨時鬥皇巴
今次抽籤有別於過去唔同球會代表飛去瑞士尼翁參與抽籤過程，主持以網上視像訪問各家球會代表，但一眾人士喺過程中都未見戴口罩。八強抽籤嘅焦點一戰必數未踢次回合嘅皇家馬德里同曼城一戰勝方，硬碰祖雲達斯或里昂嘅勝方，意味C朗可望倒戈由佢帶領贏得四次歐聯冠軍嘅舊東家，不過經過首回合賽事，皇馬同祖記都係落後嘅一方，要後上反勝對手出線絕對唔容易。
羅拔仔爭歐洲金靴
另一場焦點賽事，有美斯坐鎮嘅巴塞同意甲拿玻里一仗勝方，就會面對再一次衞冕德甲嘅拜仁慕尼黑或者英超勁旅車路士。巴塞同拜仁喺歐聯賽場可以話係老對手，但相對首回合已領先車仔三球嘅拜仁，作客僅和拿玻里嘅巴塞要脫穎而出有一定難度，至於今季各項賽事已入51球嘅拜仁中鋒羅拔利雲度夫斯基，亦要繼續爭取入球搶歐洲金靴獎。更值得留意，呢場對碰嘅勝方出線四強後，亦有可能遇上皇馬、曼城同祖記等強敵，即係話美斯同C朗有機會四強碰頭，但無論王者對壘最後係咪會發生，上半區嘅戰情都預計會相當刺激。
另外兩場，西甲馬德里體育會鬥德甲嘅RB萊比錫，16強2支球隊分別淘汰上季嘅冠軍同亞軍，今次碰頭亦極具新鮮感。異軍突起嘅意甲新軍阿特蘭大，就會大戰法甲霸主PSG，所以話之前成日喺歐聯唔好彩嘅巴黎，今次避過晒班勁隊兼剋星，入決賽機會大增。
歐霸盃亦喺稍後時間抽埋籤，大家最關注當然係16強首回合已領先寧斯5:0嘅曼聯，將會喺八強面對土耳其球隊巴沙克舒希同丹超勁旅哥本哈根嘅勝方。