前日講起與「英國升學」專家陳思銘談英國教育，問佢英國考A Level試，香港學生好似成績特別標青，攞A*有如探囊取物，係唔係香港學生特別叻？陳思銘話可能係嘅，但英國學生亦好多得到A*，其實近年英國高級程度考試，評審鬆手，有grade inflation現象；搞到現時不少大學要「有條件錄取」嘅學生再參加本校特別入學試，如劍橋、牛津、華威等等都有。唔怪得啦，前星期與一位中大教授吃飯時，佢講及兒子已獲劍橋取錄，但要兒子多考一科劍橋入學試之高級數學才作最後決定，換言之，信唔過A Level之高數成績也。陳思銘話不止英國大學有本身入學試，名牌中學及文法中學亦有。至於面試多數考考生之推理邏輯、應對、及自由思維，不少屬於「冇得補習」嘅問題，事緣華人學生，亞裔學生以考試well-trained聞名，學校對華人學生（尤以中國學生為甚）之高分考卷，不敢過信！所謂well-trained，講得客氣，其實即是強力補習，面試亦有面試訓練班，教招收學生人員防不勝防，錄取咗一啲入學後證明係「考試機械人」嘅學生。
香港唔駛強力補習，學生點都會係well-trained嘅嘞。肥仔K個大女夠運，今年電腦派位升小一，抽中第一志願入學，一身鬆晒。老總小G個仔就抽唔中，要去心儀學校叩門，忙足兩個星期，幾乎瘦咗幾磅。肥仔K大女近兩年食慾大增，猛咁食，漸變成肥女，肥仔K帶佢去校服供應商（三十幾年前佢都係在此做校服），話想做大一個碼，以防女兒快速增磅，點知老夥計問：「讀邊間學校呀？」答：「叫做W……。」夥計笑言：「唔駛買大一個碼嘞，呢間小學啲學生三個月後會嚟買細一個碼嘅！」咁神奇？即係功課好多？到咗家長日，帶埋手提行李拉喼去學校買書，學校話：「有暑期功課派，九月開學前要交齊。」肥仔K女兒還未升讀小一，便要做暑期功課，為之O晒嘴，佢還在幼稚園K3返學，每日都要做功課，小孩子當然不樂。一問之下，原來好多朋友嘅子女入讀小一都係如此，未返學已要做功課，你話香港學生係唔係well-trained呢。