民主派光復區會之後俾政府陰謀削權，工作難開展，但至少鏟除到違規洗腦banner。嗱嗱嗱，大家最近行街時，有冇見到一啲無名無姓，寫住「國家安全法 保護一國兩制 還香港穩定」嘅橫額？原來呢批橫額未必全部合法。去年11月區選成功光復西環選區，踢走民建聯副主席張國鈞嘅彭家浩，最近發現區內突然湧現大批支持港版國安法嘅非法橫額，佢向食環署同地政署反映後，最近成功清走呢啲非法橫額。
彭家浩話，由於非法橫額嘅數量龐大，令佢覺得背後係有國家機器，試圖透過以本傷人嘅方式宣傳，所以即使明知非法橫額會被人拆走，都要夾硬展示以惹起巿民關注。佢個人覺得，不論呢啲非法分子掛幾多橫額都好，始終都係收買唔到人心，「因為香港民意好清楚，普遍香港人都係唔接受呢條惡法」。有網民大讚彭家浩「good job」，另有人話拆咗橫額後，「當場順眼晒」。