曼聯中場保羅普巴近年成日鬧轉會，但自從蘇斯克查上任，加上同波基斯費南迪斯（B費）踢出默契，有指同紅魔只剩一年合約嘅佢，真係可能回心轉意，聽蘇B講乖乖續約。
隨住另外兩位中場麥湯米尼同尼曼查馬迪先後續約，蘇B近日就催普巴都動筆，而呢位法國國腳最近接受紅魔官網專訪就話：「我好開心自己可以返番球場，亦好享受可以返番球隊，班隊友好信我，咁樣對我自信有好大提升，而且隊波好明顯進步緊，我喺中後場睇住B費、拉舒福特、安東尼馬迪爾同格連活特入波，就覺得好靚。」事實上，喺武肺打擊球壇經濟下，都冇乜球會可以畀得起一億鎊帶走普巴，索性留隊好過。