香港爆發第三波武漢肺炎疫潮，市民又要加強防疫，騙徒亦趁機出動，贒中經常就疫情向港府提出當頭棒喝嘅港大感染及傳染病中心總監何栢良。嘩，呢位騙徒認真唔知碇，乜佢唔知香港啱啱成立咗國安公署，唔知道國安權力無遠弗屆，仲可以將人「送中」？
話說近日再次有不法之徒，以假錄音冒認何栢良，錄音首句係：「各位呀……因為個情況……」，之後就提及有關酸性及鹼性問題，講到似足專家分析咁，而呢條錄音喺WhatsApp群組瘋傳。
「病毒唔等人，真假要識分」
何栢良當然一頭霧水，佢喺facebook發出題為「重要聲明：病毒唔等人，真假要識分」嘅帖文，話有一條2分10秒嘅假冒錄音，「頭一句『各位呀……因為個情況……』……又講乜酸乜鹼性……」，呼籲市民唔好再流傳，強調喺香港假冒聲稱自己係醫生，屬刑事罪行，特別註明「錄音如有假冒，我會報警，甚至考慮報國安」，唔知騙徒有冇嚇到腳震？
雖然成為「苦主」，何栢良不忘教市民分辨真假錄音，佢話呀，真嘅何栢良嘅錄音呢，頭兩句一定自我介紹全名，會講錄音日期、時間，強調「唔會寫錯自己個名囉；唔會有『黑』公關/宣傳廣告內容」，最重要係咩呀？可能係呢點，「會有傳媒引用」。
李八方