中國的做事方式往往震驚全球，好似前日，總理李克強原來去咗貴州，仲特別考察當地數據中心，而官方中國政府網發放消息就提出一個問題：「李克強貴州考察數據中心釋放甚麼信號？」不過好多網民睇完有關報道，個個都為個數據中心擔心。
點解要為數據中心擔心呢？原來佢哋留意到報道入面，李克強做咗個好特別舉動，佢參觀騰訊貴安七星數據中心時，問緊數據存儲規模同服務器性能時，「隨即從服務器上抽出一塊硬盤，仔細閱讀上面的文字說明」，睇到呢到好多網民同連登討論區巴打譁然，有巴打話數據中心要開OT執手尾，有人就話「同喺香檳塔抽走隻酒杯冇咩分別？」點解大家咁震驚？原來一切同存檔嘅生死存亡有關，事關伺服器運行時直接抽出硬碟，輕則需要系統重建，嚴重就要同存檔說再見！
有備份唔使驚
八方請教過香港資訊科技商會榮譽會長方保僑，佢話大家講得嚴重咗，事關呢類行RAID（磁碟陣列）嘅系統，本身有其他備份，就算抽走一隻硬碟都應該唔會出事，但佢亦唔建議人咁做。咁李克強呢次抽出硬碟究竟有冇咩影響？八方私下打聽，原來騰訊系統係有三備份，唔通李克強想釋放嘅信號，就係存檔仍然平安？