建制圈子噚日好雀躍咁分享一張「大和解」相片，係乜嘢相呢？原來係一班自稱「不代表喇沙書院/拔萃男書院或其舊生會的立場」嘅人，喺紅隧落咗個廣告，大大標題寫住「本是同根生」，仲話「團結一心，愛國愛港」，學界皆知男拔同喇沙兩間頂尖男校一向係「世仇」，每年學界體育比賽都鬥生鬥死，𠵱家為咗愛國愛港，暗示即使係宿敵，都可以受國安法感化，化干戈為玉帛，真係十分肉麻，但話雖如此，其實呢個廣告背後充滿歧義，好多人自行解讀唔同意思，仲令人想入非非。
網民集體創作夠抵死
首先「本是同根生」呢句出自曹植嘅七步詩，有網民話下一句就係「相煎何太急」，歷史上曹植被當權嘅哥哥妒忌迫害，曹植借詩反問哥哥，點解要急於殺我呢？如果咁解讀，呢個廣告玩味甚濃，似乎又唔多似撐國安法，反而似問北京何需立咁辣嘅法對付香港人。亦有百厭嘅網民話，呢個廣告hehe味重，問兩間男校講「同根生」，是否意有所指？仲話今次係一群舊生聯合搞，係咪指玩集體遊戲？仲有人心邪拎兩間學校舊生嘅擺位開玩笑，問點解「喇沙在下，拔萃在上」，有冇特別意思呢？
好地地一個撐國安法嘅廣告，結果變咗「曲到圓」，到底落廣告嘅人係豬隊友，定身在曹營心在漢？八方真係分唔清。
李八方