2004年就開始自動當選進出口界立法會議員嘅民建聯黃定光，噚日原本就今屆進出口界其中一個選民資格提出質疑，聆訊呢個選民資格期間，佢同選舉事務處為咗一份文件而爭拗，但最終原來怪錯人，仲被在席嘅出版界選民嘲諷：「係咪瞓着咗？」
質疑業界選民資格
經常喺立會大會「閉目養神」嘅黃定光，噚日出席選民資格聆訊，質疑一間叫「中安實業有限公司」合唔合乎選民資格，指佢哋持有嘅進口同出口應課稅品牌照不足12個月，又多次引用文件，強調要有進出口界功能組別資格，應課稅牌照同商業登記都要同時兼備，如果唔係就會有種票嘅「大漏洞」。不過聆訊期間，黃定光被問到有冇收過選舉事務處嘅書面陳詞時，佢就話冇收過，仲話自己有一追再追份文件，仲聲言要向選舉事務處投訴，話選舉事務處做事好兒戲喎。
不過選舉事務處澄清，7月3日交咗文件，仲由黃定光助手簽收，有埋簽收紀錄喎，搞到黃定光即時口啞啞。終於佢喺文件堆中搵返份嘢出嚟，同場出席另一聆訊嘅出版界選民就揶揄：「係咪瞓着咗？」搞咗一輪，裁判官王證瑜話已考慮黃定光嘅反對理由，但就認同選舉事務處嘅解釋，最終駁回黃定光嘅反對申請。