虎媽A的教育界消息十分靈通，皆因佢有不少媽媽群組討論兒女教育問題，學校動態等等，近日佢向左丁山報料，有朋友仔女等候排隊入去淺水灣國際學校（HKIS），已等咗兩年，最近收到通知，可以在九月入學，為之興奮到震。點解等得到？一查先知，好多學生會離開喎，插班大把位。另一間講法文嘅國際學校據講亦有百名以上學生離港，今年係香港家長送子女入國際學校之最佳時機。左丁山對虎媽A講：「好似我哋講中環塞車代表經濟繁榮咁，難入國際學校即表示有好多expat在港居住，證明香港係一個金融中心、商務中心，依家咁多國際學生離開，唔係好兆頭噃！」
虎媽A話：「咁，過幾年在香港開辦國際學校嘅投資者，或要面臨經營困難？」梗係啦，香港有錢人投資，搵外國名牌學校來港辦學，本以為國際學校短缺，內地人學生大把，呢次分分鐘踩正香蕉皮。
國際學校學生來源，除內地人外，本港中產階級家庭亦貢獻不少，中產階級會唔會捲起移民潮帶走不少國際學校學生呢？本來現在移民並不容易，比1980年代難好多，點知英國突然宣佈BNO（英國海外公民）護照持有人可以去英國居住五年，其間工作或讀書，第六年可申請入籍攞英國護照，人數不限，有資格申請人士高達295萬，呢個數字都幾大，但未必人人去，若有五六十萬人走去英國，對本港已經有極大影響；去英國搵工幾困難，但對護士醫生、電腦專才、專門技術人員（如水喉匠）嚟講，英國多多都歡迎，搵工幾易。英國之得，即香港之失，唔影響本地社會經濟結構先至奇。屈才女等深藍當然講到：「要走就走啦，好行夾唔送。」假如五十萬人走了，香港樓價連施老闆、湯富豪出口術都難以托得住，明日大嶼計劃可以即刻擱置。
虎媽A就話：「好行夾唔送係藍絲噏嘅啫，中國外交部就好反對。英國衞報報導話中國反對BNO移民計劃，指英國無權給予部份香港人英國居留權，英國必須負責所有嚴重後果呀！」係噃，中國駐英大使劉曉明話明英國如此做法違反中英協議喎！乜仲有協議嘅咩？中國明明話過中英聯合聲明係歷史文件，廢晒武功㗎嘞！