香港演藝圈經常被形容為青黃不接，但其實近年也有不少新演員努力成長，一步步走上去。模特兒出身、港版孖妹KOL的26歲張蔓莎（Sabrina）有份演出ViuTV新劇《地產仔》，同劇拍檔都是新生代演員，包括吳肇軒、胡子彤、邱士縉、余香凝、廖子妤等，還有她的孖生姊姊張蔓姿（Gigi），為觀眾帶來年輕活力與新鮮感。
「仲係一齊瞓」
Sabrina這次在劇中與孖生姊姊Gigi飾演「連體嬰」，她說：「雖然角色冇驚喜係連體嬰，但劇裏面都幾搞笑，因為需要同步講對白，就算每一粒字都要同步，所以會喺屋企練習好多次，因為唔夾就會NG，所以都期待出嚟嘅效果。」二人從小到大一起成長，現在也經常以孖妹姿態一起工作，Sabrina形容Gigi是她人生的一部份，「我覺得佢係喺我嘅血裏面，我哋喺肚入面已經一齊，大家好難想像我哋嘅connection，我哋𠵱家仲係一齊瞓。」
很多人都會好奇雙生兒是否真的有心靈感應這回事，Sabrina笑指當然不會知道對方正在做甚麼，「但都可能會有個氛圍，例如試過佢唔開心，可能我都會莫名其妙唔開心。」擁有相似的外表，工作又拍住上，問到會否擔心因此被互相比較？Sabrina表示不擔心，認為大家都將她們作為一體來看，「其實大家會覺得我哋似，但風格就好唔同，日常生活我哋都會盡量分辨大家，我要咁樣，你要咁樣，所以今次拍劇要做到好似，反而要搣甩呢個諗法。」她說經常一起工作之後，反而想大家可以看到她們不同的面貌。
Sabrina喜歡演戲，因為可以經歷第二人生，同時更加了解自己，「做演員要比其他人更加去探索自己，拆卸、重組、反省，以前我會覺得人有黑暗面係一件唔好嘅事，但𠵱家發現其實可以作為演員嘅武器，有時多一啲稜角，未必一定係壞事。」她希望將來有機會嘗試飾演殺手，又想挑戰喜劇，因為搞笑角色與她文靜的外表有落差。
希望發展音樂
除了演戲，Sabrina也是個喜歡音樂的女生，「我會彈結他、自彈自唱，又會寫吓歌。」她笑指自己貪心，也希望向音樂發展，「音樂係自己興趣，兩樣嘢其實冇衝突，因為音樂同演戲係互通，都係一種表現與表達自己嘅方式。」
化妝：Lauren Lee
髮型：Keith [email protected]
更多精采時尚內容，盡在 http://add.appledaily.com。