拜仁慕尼黑（圖）上周六以4:2輕取利華古遜，紀錄性第20次贏德盃冠軍，仲連續兩年成為本土雙冠王，真係威水！拜仁今場靠阿拉巴、基拿比，同埋羅拔利雲度夫斯基入兩粒，輕鬆大勝有施雲賓達同夏維斯入波嘅利華，值得一提，羅拔仔今季已經入到51球，繼續刷新紀錄，而拜仁亦第13次榮膺本土雙冠王，橫行德國球壇！另外，拜仁亦創下各項賽事17連勝嘅德國紀錄，教練費歷克亦締造歷史，成為第一位先後以球員同教練身份贏得本土雙冠王嘅德國人，真係屈晒機啦。拜仁已經贏咗德甲同德盃，下一個任務就係準備下個月重開嘅歐聯，佢哋喺停擺前嘅16強首回合作客3:0大炒英超嘅車路士，晉級形勢非常樂觀，又睇吓「宇宙仁」有冇計做三冠王喇！