經歷武漢肺炎，香港失業率高，各行業都裁員。八方聽聞有人逆市請人，呢份工仲要筍到入職門檻相當低，30歲以上，學歷唔高，體能又差都照請，聽落似倫敦金騙案？錯喇，係popo請人呀！
之前大家覺得要考警察即使冇乜學歷，起碼要後生同體能好，不過舊年抗爭運動警隊跳船人數多達450人，比前年同期高出近四成；相反成功招聘既人數比前年同期少四成，之前如果唔係傳媒揭發，分分鐘連考試出貓警都可以過關畢業。面對popo荒，警隊惟有降低請人門檻，大sell警隊福利特權。香港警察噚日係facebook上載咗一段招募短片，開場旁白第一句就講：「唉！我都30幾歲人啦，學歷又唔係高，體能又唔多掂，想考警察人哋都未必請我啦！」隨即由撐警藝人楊明客串嘅Easy Sir就叫安慰吓佢，話要去片睇睇「成功例子」。
狂sell福利特權
原來「成功例子」係三個舊年先加入警隊，全部都已經30歲以上嘅男女警員。講到點解要加入警隊，以為係愛定責任呀？錯喇，係窮呀，講到明係為「穩定收入」、「宿舍」、「警察遊樂會」同埋「唔受經濟因素影響」，簡言之就係錢同關。年紀最大、36歲駐守長沙灣分區的阿K仲好老實咁話，學堂度仲好多同佢同年㖭。另一個警員阿峰更話，只要未到退休年齡，咩年紀其實冇分別！八方睇返70年代既警隊招聘廣告，強調警隊有幾難考，不過過時喇，𠵱家最重要係「忠誠勇毅」！
李八方