上周六意甲聯賽，基斯坦奴朗拿度（C朗）終於射入佢加盟祖雲達斯以嚟第一球罰球，領軍喺主場以4:1大破拖連奴，喺聯賽榜首已拋離排第2嘅拉素7分，九連霸在望。更威水嘅係，C朗成為祖記近60年嚟首位喺單季聯賽入球達25球嘅球員，再威啲係佢係史上首人分別喺英超、西甲同意甲都可以單季攻入25球。至於第648次喺意甲上陣嘅保方，就壓過咗AC米蘭傳奇後衞馬甸尼，成為聯賽出場次數最多嘅紀錄保持者。
祖記今場憑保羅戴巴拿同古達度嘅入球一度領先2:0，拖連奴完半場前憑一球12碼追到落後1:2。61分鐘，C朗喺禁區頂主射罰球入網，幫祖記領先3:1，之後佢哋再藉住拖連奴守將迪積迪積嘅「烏龍球」，以4:1贏出呢場都靈打吡。
祖記59年嚟首個入25+
C朗射罰球勁就唔使多講，但據數據顯示，原來佢加盟祖記咁耐以嚟43次主射罰球，要到今次先開齋，而呢球同時亦係佢今季第25個聯賽入球。呢位葡萄牙球星唔單止成為咗1960/61年球季射入25球嘅施禾利後，第一個單季喺意甲入到25球嘅祖記球員，佢仲要係歷嚟第一個分別喺英超、西甲同意甲，都可以錄得單季入球25+嘅球員，真係威到盡。
C朗賽後話其實自己等咗呢個入球好耐，𠵱家信心返晒嚟，但佢強調最緊要都係幫球隊攞晒三分。祖記𠵱家喺聯賽榜以30戰得75分帶頭，拋離啱啱喺主場吞咗AC米蘭3隻光蛋嘅拉素7分，意甲九連霸嘅機會高唱入雲。
保方648場過馬甸尼
祖雲達斯能夠喺意甲遙遙放領，除咗因為前面有C朗，當然亦要多得保方保住後方。連埋今場，保方已經喺意甲上陣648場，成功打破米蘭名宿馬甸尼保持嘅647場紀錄，佢仲話自己唔會浪費上天畀佢嘅天賦，希望繼續喺最高水平嘅賽事征戰。其實呢位42歲鋼門早排已經同祖記續約1年，所以嚟緊都會不斷刷新紀錄。
