以前鍾意搭的士過海，由中環去沙田，一定行西隧，取其快速，冇咁塞車也。點知滙豐銀行竟然會唔派息，連宣佈咗嘅末期息，股價除淨後仍然可以取消，可知左丁山做咗一世人，蠢到唔知道世上無必然，百年老店都唔係牙齒當金使之時，仲有乜好講？入行時，老闆教落，a banker's reputation is everything，後來遇到Adrian Zecha先生，佢為咗早期承諾，蝕大本買入William Hunt股份（後來在1987股災前，經左丁山賣咗一大半，賣唔晒係因為滙豐銀行證券部一時間處理唔到大量交收）；左丁山曾問佢：「其實公事公辦嘅話，你有大把理由唔駛買入WH嘅啫。」隆加先生淡然回應一句：「I gave my word.」
21世紀了，唔知香港人仲會唔會明白甚麼係I gave my word呢？言之令人心淡。講番坐的士，依家突然覺得坐的士由西隧過海係好貴，兼且塞車嘥時間，於是諗到二元過海，由IFC過ICC，到圓方南面的士站（即W Hotel出面）坐的士去沙田，慳番隧道費。呢日如此坐的士，司機居然問：「老闆，你點睇國安法呀？」當堂精神為之一震，唔係一振，張曉明話國安法係一把高懸利劍，劉兆佳話國安法有震懾作用，你估係講笑咩。定一定神，答咗等於唔答：「你地司機大佬一定冇事嘅，搞政治、傳媒、出書嗰啲就驚啦。」司機又問：「咁你支持吖，反對吖？」左丁山答：「你睇乜報紙呀，文匯大公有幾十版廣告支持國安法，商界大亨全部表態。」司機話：「我睇免費報紙㗎咋，報紙費好貴。」於是轉去講利物浦，賭波賭馬，司機當堂眉飛色舞，唔再問國安法。
時光倒流至1987年間，跟中國專家中貿林到上海一遊之後，去台北見銀行客戶，在來來大飯店「湘園」吃蜜餞火腿，客戶年紀與左丁山差不多，係公司太子爺公子H，佢問：「有冇出過埠呀？」左丁山答：「啱啱去完上海。」公子H面色一變，立即叫左丁山細聲啲：「飯後來我家喝下午茶」，於是急急食完，坐佢架車，直奔陽明山，車上彼此不發一言，到咗大屋客廳，傭人奉上烏龍茶，公子H叫傭人出去，然後問：「上海情況如何，公眾地方不能講，恐別人聽見！」當年入住華國飯店、統一飯店、兄弟飯店等酒店房間門後，皆有「嚴防匪諜」四字，蔣氏父子只准商人搵錢發達，不能談論政治，台北周圍有違章建築，政府視若無睹，大前提就係：你地老百姓搵錢好嘞，唔好講政治。而今北京在香港頭上掛上利劍，目的不外如此，你地掛住搵錢得嘞！