劉俊謙與蔡思韵昨日到油麻地為電影《幻愛》即將推出的同名小說宣傳，提到電影大前日上映時，首日票房已錄得15萬，截至前日累計票房已有74萬，蔡思韵有信心說：「嗰日係第一日，又係平日，可能weekend多人放假，可以出嚟睇。」他們表示會多做謝票場，報答入場觀眾的支持。劉俊謙指電影以屯門為背景，希望可以多到屯門進行謝票，他說：「《幻愛》差不多成套戲都喺屯門拍，我今朝望過，發覺屯門幾full，我就覺得會唔會呢套戲對屯門嘅居民有啲親切感。」
出小說道原意
將於今個書展推出的電影同名小說，編劇曾俊榮透露推出的原因：「編劇同導演之間會有好多分歧，拍完套戲出嚟，我覺得唔係咁㗎喎，於是我就諗不如出小說，寫返自己嘅原意出嚟啦。開頭諗過自己寫返，但又好懶，於是搵咗蔣曉薇寫。」小說作者蔣曉薇指自己去年12月看《幻愛》優先場，當時已覺得好好睇，她說：「有一日，編劇問我會唔會想寫（小說），佢搵我係1月尾，但要3月尾交稿，因為當時係疫情期間，加上我住喺屯門，呢個地理上、屯門故事好打動我。」
拍MV獲稱讚
蔡思韵近日演出江海迦（AGA）新歌《See you next time》MV，獲不少人稱讚靚女。另外，她指稍後會拍攝另一部電影，但詳情未方便透露。劉俊謙會返劇場為舞台劇《午睡》演出，故事講述7、80年代的生活，他說：「對照返當下好多人嘅狀態，大家對於殖民呢樣嘢到底係乜呢，對於回歸祖國嘅感覺又係乜呢，呢套劇放咗好多着墨去探討，嗰陣時啲人對身份認同，其實好似同𠵱家都幾有關係。」
劇情提到回歸及身份認同，被問到「港版國安法」已經實施，會否擔心這類話題被視為敏感題材？劉俊謙雖未有正面回應，但認為故事只是描述往昔，他說：「故事由陳炳釗導演寫，喺30年前已經寫，當時嘅故事未完整，不過之前已經演出過，今次係重演。我覺得佢係講返以前嘅年代，對於以前嘅描繪到底帶畀今日有乜反思，似乎從呢個角度去切入囉！」