林日曦去年12月首度舉行棟篤笑後，上月尾他忽然宣佈由前晚開始，於九展舉行合共13場「細聲講：半厭世」，由公佈到舉行前後只有十多日，也是限聚令下首個重開的演出，場內只可以坐一半觀眾，合共只有1,500人。今次是港版國安法實施後舉行的首個talk騷，全晚內容共有8個重點。相對去年加入反修例運動中示威者的抗爭片段，朗讀一封「給林鄭的感謝信」暗寸因她令市民團結一致反對政府的荒謬管治等，前晚林日曦放棄明刀明槍，改玩隱喻嘲實施國安法令香港變成一間鬼屋，但他卻不言棄借用六合彩來祝願港人：「願頭獎，歸香港！」
【六合彩篇】望見希望
林日曦以六合彩比喻抗爭，笑言香港人很奇怪：「你哋係從來都冇放棄過買六合彩……49個號碼，你要揀6個出嚟，6個都中晒，你知唔知個機率係幾多，係1,400萬分之一。你出街被鱷魚咬死嘅機率係300萬分之一，即係話你要中六合彩頭獎，仲難過你出街畀鱷魚咬死。但點解大家都期期買？因為『買個希望吖嘛！』，但你從來都冇聽過買六合彩買到有無力感，買個希望嘛，學乜人有無力感啊？買六合彩時每個人都係馬丁路德金嚟，I have a dream，要中六合彩，下次再買到有無力感，你要記住呢句說話，唔係睇見希望先去買，而係買咗六合彩先見到希望，願頭獎，歸香港。」
【口罩篇】交收贖金
今年初因武肺疫情，全球一度瘋狂搶口罩，林日曦指家中有十多人，「做仔嘅」要幫家人四處撲：「邊個累到我哋咁有孝心，咪就係政府同食蝙蝠嗰個人同埋譚得塞（讀成菜）塞囉，我係咁叫佢，叫佢譚詠麟都得。」林日曦又描述在日本撲口罩的情況，最後撲到兩盒寄回香港，但因怕被人偷去，故只在包裝上寫着很細的「mask」，但結果他回港後口罩仍未寄到。他又形容跟母親交收口罩時，情節如綁架交收贖金。
【隔離篇】鏟頭變型
林日曦早前曾因疫情在家隔離，他在台上分享在家時所拍的相片，包括如用Zoom跟同事開會、自己炮製的晚餐、網上看YouTube、開YouTube channel；但同事cap圖時竟同時cap了「藍絲」華記，他即笑言要追究同事。最後還有林日曦為自己剪skin head的自拍照，他謂因見元斌的skin head靚仔相，故決定一剃。其實他之前已說過剃skin head，網民一直求相但不成功。
【嫲嫲篇】心要乾淨
林日曦回想小時候與嫲嫲相處點滴，他指當時性格反叛，跟嫲嫲關係很差，覺得她又執紙皮又愛乾淨，抹枱時竟然抹埋枱底，感到相當奇怪，直至有天嫲嫲暈低入院，他才會日日到醫院探病跟她說話，後來嫲嫲離世，也是他首次近距離接觸死亡。近日因疫情關係，林日曦自言潔癖越來越嚴重，甚至覺得整個世界都好污糟，他抹枱時，心血來潮開始抹枱底。此時今年金像獎得最佳女配角的區嘉雯，扮演嫲嫲出場說：「知枱底會發霉咩，唔好以為冇人見到就唔理，呢世界好多嘢好污糟，好易搞到樣樣嘢都污糟晒，越見唔到嘅地方越要乾淨，唔止枱底。」區嘉雯此時指着心再說：「睇嘢要睇埋裏面 所以要抹乾淨埋呢度 。」
【鬼屋篇】點都要行
自言很怕死的林日曦幾年前去醫院做身體檢查，醫生忽然指他腎部有陰影，要買plan再做檢查，他稱要出走廊考慮：「其實我係好驚，唔想面對，嗰刻令我諗返去富士急嘅鬼屋時，見有兩個日本學生妹嚇到震晒企喺度唔行，只係咁話：『chotto matte』（等一等），十足我喺醫院咁，企喺度驚，亦似某部份香港人，check到有個陰影，唔知點行落去。其實一個人行咗入鬼屋，想唔好再驚，得兩個方法，一係行落去，一係即刻走，最無補於事嘅，就係企喺度驚。至於香港呢間鬼屋，你係想行落去，定係即刻走？」他還改編王菲的《容易受傷的女人》成為《容易腎虧的男人》即場演唱。
【父母篇】關係好轉
林日曦母親早前離世，他前晚提及自己和父親同樣傷心，但如果以「防禦性悲觀性樂觀性宏觀」去看待母親離世，結果又得出正面訊息：「睇得到我同老竇嘅關係有微妙變化，佢fb仲add咗我，隔咗七年先accept我。以前我忙嘅時候，幾個月都唔見，但𠵱家日日見，以前老竇食大家樂，我𠵱家同佢去食大渣哥。今日佢都有嚟九展睇綵排，笑得好開心，不過大部份時間都瞓咗。」
【熱血動漫篇】偷偷飲水
林日曦指卡通片《足球小將》的「戴志偉」是他偶像，因他每集都向龍門跑，正如人生向目標跑，他邊跑邊說：「好多熱血動漫都唔飲水。有一次我再睇時去飲水，結果諗通，『戴志偉』係趁廣告時段去偷偷飲水。」他指每一場夢想皆是漫長，因此要不停跑不停飲水：「你哋有冇睇《蜘蛛俠》，佢有句話『with great power, comes great water』，中文即係能力越大飲水越快，戴口罩飲唔到水？董建華都係咁啦。」
【黑社會篇】罐頭笑聲
林日曦稱中學時入讀band 3學校，若要安然無恙便要扮黑社會嘅「黑面」，在校中他結識了疑似黑社會的肥獅、矮榮及金毛，三人經常講爛gag搞笑，令他明白為何日本節目一定要加罐頭笑聲：「一聽就不其然會笑，笑可以傳染，可能受到三條友影響，無時無刻想身邊人笑，《100毛》都係想香港人點都笑吓，可以笑的話不會哭，大力笑先可以大力嬲。」他曾想過網上開騷，但會因此不能聽到現場觀眾送給他的「罐頭笑聲」。
