現年42歲的袁彌昌家中，有金黃老竇袁弓夷、深黃胞妹袁彌明，藍絲老婆、新民黨立法會議員容海恩，夾在中間的他，自稱是綠色的「事實派」，但好仔如何可以兩頭幫？
撰文：楊定
攝影：林賓尼
袁彌昌的71歲爸爸袁弓夷上月聯繫美國官員協助港人，還親身到美國會晤眾議院共和黨議員佩里（Scott Perry）和美國共和黨眾議員約霍（Ted Yoho）。7.1開始施行國安法，香港自由即被收窄。袁彌昌日前在灣仔接受《蘋果》訪問，直言擔心言論惹火的老父返港有風險，現階段只適宜留在美國避風頭，他指全家不可在港團聚着實是「悲劇」。
「老婆喺度會避忌」
「媽咪都好擔心，叮嚀我收多啲風，了解詳細情況係點。」袁彌昌指胞妹袁彌明和胞姊袁彌望近年跟父親同一陣線，建制派的容海恩卻於2018年嫁給袁彌昌，彼此政見不同，但大家見面時都克制未釀成衝突，袁彌昌說：「我哋不嬲成家人講嘢好自由，冇乜避忌，除咗我老婆婚後加入，當老婆喺度會避忌吓，我作為光譜中間位置，又知道一啲內情，唔使拗，我會將啲事實同內情話番畀佢哋聽，咁就一天都光晒。」袁彌昌指自己身處黃藍家庭，卻不覺是磨心：「我家可能同香港其他家庭少少唔一樣，當唔知內情就會用自己價值、取向同判斷去爭拗，咁永遠都拗唔完。」
袁家飯桌，可免則免少談政治，袁彌昌說：「我喺袁彌明面前都唔會講葉劉、陳家珮，亦唔講TVB，有時我媽咪仲會敏感少少，如果我老婆喺度，佢話唔好去袁彌明屋企，去我家姐屋企，佢覺得家姐屋企中立啲，但我又覺冇乜分別。妹妹近年政見上傾向勇武攬炒多啲，疫情呢段期間，大家work from home見少咗。媽咪叫我哋唔好見住，不如隔一排先見。」
袁彌昌讚老婆容海恩有分寸，「佢知道邊啲幾時講，幾時唔應該講，爹哋好鍾意發表偉論，就算邊個喺度，佢都會講，佢唔係鬧人，佢會講中共好衰，太太明嗰個始終係佢老爺嚟，唔會加意見。」袁彌昌笑言自己是家中共融的橋樑，「個個男人都要做呢啲嘢，好似婆媳關係咁，中間要人疏導。有時媽咪睇到老婆喺立法會講咗啲嘢大家唔高興，我中間要斡旋吓、緩和吓。首先要有道防火牆，等佢哋唔好燒着先。」若然見到勢色不對，一有dead air或奇怪氣氛，袁彌昌就叫大家吃喝扯開話題，他說：「我係學者會好啲，我企中間做思考部份。」
持BNO冇計劃移民
堅稱非藍的袁彌昌指跟藍絲老婆相處沒問題，他說：「我哋始終都係兩公婆嚟，唔好當我哋係唔同政治嘅人。」袁彌昌自爆經常留意太太喜怒變化，「有時佢心情唔好，我唔會特登講，外人未必知佢苦處同掙扎位，我會體諒安慰佢。大家唔使放大我哋政見上分別，其他夫妻都有好多嘢有分別，我唔係要娶個女人版嘅袁彌昌返嚟，我要容海恩。」與容海恩兩年抱兩，育有兩女分別一歲半和半歲，不少家長眼見香港現況已作出移民計劃，但袁彌昌卻不準備離開：「真係走咗，下一代就會冇咗香港嘅身份，同冇咗呢個根，畢竟我同老婆成家都喺呢度出嚟，我同老婆都冇其他國籍，我得本BNO，兩年前補領嘅，太太都仲未補領。」