市民應該記得2016年立法會議員鄭松泰喺立法會議事廳內倒插國旗同區旗，結果被控違反《區旗及區徽條例》、侮辱國旗及區旗罪名成立，如果將個區旗入面紫荊花反轉，又算唔算侮辱區旗呢？不過今次反轉紫荊花嘅唔係民主派嘅人，而係官媒新華社。
今年7.1港版國安法生效，官方大力宣傳香港再出發，官媒新華社亦喺twitter貼咗多幅賀回歸、撐國安法嘅圖片，其中一幅圖寫有「回歸23周年 香港再出發」，圖中一名女子白衣上寫住I love H.K 語句，背後有香港區旗。不過八方睇清楚，圖中區旗嘅紫荊花掉轉方向，由順時針繪成逆時針，紫荊花亦應該放旗中間，而非新華社圖片嘅靠左。
八方左睇右睇，呢個區旗，應該同官方正式區旗唔同樣，其實香港《區旗及區徽條例》入面，有晒正式規格，睇吓就知，而《區旗及區徽條例》規定，不得展示或使用不合規格的國旗、國徽、區旗或區徽。任何人公開同故意侮辱區旗或區徽，即屬犯罪，一經定罪，最高要監禁三年㗎！
李八方