香港人心情沉重的6月，極易引爆抑鬱，對抗負能量，絕對不能「私了」，要搵同路人聊（療）傷，假如天生孤僻，更要諗計自保，重整陣線，試吓咁：
謝絕「得逞」的眾嘴臉，就算戴咗口罩都要除返落來？不，一見奴才們出鏡即刻熄機，避免視像入侵轉發，可以下載多些靚雲（攝影師將催淚煙在藍空中的影像留住，殘忍卻美麗）靚山（獅子山永遠咁堅）靚貓狗（忌廉哥謝謝你，你才是真民間特首）。
買樓要心曠神怡，賣樓唔使。睇吓賣樓資訊，分析劈價、割愛、蝕讓、要錢唔要貨的大走勢，乃係国安法長治久安的必然。行穩致遠計劃一下，2047前你未黐線的話，一定上到車，提早開心吓，去半山揀定樓。
搶奶粉自由行成為2020年国安法前的歷史遺物，国安法一立，大灣區「波板糖」大量湧至賀壽，信納啦！二次回歸，一國一制。「波板糖」肯定溝埋TG與椒，糖衣以終身監禁做料。香港人學嘢快，抽空補習吓灣區語言，到土豪代言人窒香港人「冇中央出手跨境通，你哋香港人早餓死」的時候，以適切的方言，丟那媽，得體回敬。